Me krerët e SPAK dhe BKH, Yuri Kim: Koha e pandëshkueshmërisë po mbaron!
Shtetet e Bashkuara mbështesin rolin e rëndësishëm që SPAK ka në zbatimin e suksesshëm të reformës në drejtësi, siguroi Ambasadorja e SHBA në Tiranë, Yuri Kim, duke konstatuar se zhvillimi i vërtetë po ndodh, pas takimit që zhvilloi me kreun e SPAK, Arben Kraja dhe Drejtoren e BKH, Aida Hajnaj, ku u diskutuan rezultatet e suksesshme të SPAK dhe sfidat me të cilat ata po përballen në vitin e tyre të parë.
“2021 filloi me raste të mëdha nga SPAK. Sot, në takimin tonë me shefin Kraja dhe drejtoren Hajnaj më siguruan që ata janë të përkushtuar për të dhënë drejtësi dhe për të siguruar që askush nuk është mbi ligjin,” tha pas takimit Ambasadorja amerikane përmes rrjetit social Twitter duke konstatuar:
“Qoftë për korrupsion, krim të organizuar, apo zgjedhje, koha e pandëshkueshmërisë po mbaron!”
Kreu i Prokurorisë Posaçme Anti Korrupsion dhe Drejtorja e Byrosë Kombëtare të Hetimit i rikonfirmuan Ambasadores Yuri Kim se puna po vijon intensivisht në SPAK dhe pavarësisht sfidave dhe sulmeve, SPAK është përqendruar për të treguar se askush nuk është mbi ligjin.
