Me kreun e KQZ, Gonzato: 11 Maji i rëndësishëm, zgjedhjet e para pas hapjes së negociatave!

Ambasadori i BE-së në Tiranë, Silvio Gonzato, pas takimit me kreun e KQZ, Ilirian Celibashi, tha se diskutuan për zgjedhjet e 11 majit, për të cilat ai vlerësoi se janë të rëndësishme sepse janë të parat që zhvillohen pas hapjes së negociatave dhe grup-kapitujve me BE-në.

“U takova me Celibashin sepse doja të kisha një përditësim sesi po shkon puna dhe për të parë sesi të vazhdojmë mbështetjen nga KQZ. Kemi besim te KQZ dhe pas zgjedhjeve do të vazhdojmë edhe me financimin e KQZ-së për të përmirësuar mënyrën e të bërit punën,” tha Silvio Gonzato duke refuzuar të bëjë deklaratë para zgjedhjeve.

“Unë nuk bëj deklarata para zgjedhjeve. Kemi besim te ODIHR dhe ka një mision të rëndësishëm këtu. Lufta ndaj krimit të organizuar dhe korrupsionit është në zemër të negociatave. SPAK ka një detyrë të rëndësishme. BE është këtu për të mbështetur Shqipërinë, jo të ndërhyjmë në procese. Nuk jemi këtu për të manipuluar asgjë,” tha Ambasadori i BE-së në Tiranë duke kërkuar që vëmendja të fokusohet te garantimi i një procesi të drejtë, të lirë dhe transparent.

Në fund, Ambasadori i BE-së në Tiranë, Silvio Gonzato, rikujtoi këtë klasë politike që më 11 Maj pretendon të jetë pjesë e legjislativit, se Parlamenti i ri i Shqipërisë duhet të adaptojë të gjitha rekomandimet e OSBE/ODIHR-it ndërsa përfundoi:

“Ne shpresojmë që Parlamenti i Shqipërisë do të adaptojë të gjitha rekomandimet e OSBE/ODIHR që përfshijë financimet e fushatës, çështjet e dezinformimit dhe aspekte të tjera të procesit zgjedhor. Besoj se do të adresohen shumë shpejt në parlamentin e ri sepse janë çështje të rëndësishme.”