Me Kryeministrin e Kroacisë, Basha: Lajm i shkëlqyer për rrugën që nisim më 25 prill

Angazhimi që shprehu kryeministri i Kroacisë, Andrej Plenkoviç, për ta ndihmuar Shqipërinë të bëhet një vend i denjë anëtar i BE-së, është një lajm i shkëlqyer për rrugën që nisim më 25 prill, tha Kryetari i PD, Lulzim Basha, ndërsa falënderoi kryeministrin Plenkoviç për pritjen miqësore që i rezervoi së bashku me ministrin e Jashtëm dhe të Brendshëm të qeverisë së Kroacisë.

Përshpejtimi i rrugës europiane të Shqipërisë është prioriteti më i rëndësishëm për mua dhe Partinë Demokratike. Shqipëria ka mbetur në vendnumëro në këtë proces gjatë 8 viteve të fundit, tha Basha pas takimit duke saktësuar se kjo ishte dhe tema qendrore e bisedës së sotme me kryeministrin Andrej Plenkoviç.

“Kroacia është aleati ynë historik në procesin integrimit euro-atlantik, mbështetëse e fuqishme për anëtarësimin e Shqipërisë në NATO dhe sot një shembull dhe përkrahës i pakursyer i anëtarësimit në BE,” tha Kryetari i PD duke shtuar:

“E njoha kryeministrin Plenkoviç me platformën tonë të integrimit. I shpreha mikut tim dhe të shqiptarëve vullnetin e vendosmërinë tonë për të përmbushur të gjitha kushtet për nisjen e bisedimeve me Bashkimin Europian. Ky proces do të sjellë për Shqipërinë fonde të mëdha për bujqësinë, biznesin e vogël dhe të mesëm, sipërmarrjet e të rinjve dhe demokracinë,” tha në fund Kryetari i Partisë Demokratike, Lulzim Basha, ndarë me kryeministrin kroat bindjen se PD do t’ia dal ta bëjë Shqipërinë anëtare të Bashkimit Europian ashtu siç e bëri anëtare të NATO-s dhe liberalizoi vizat me zonën Shengen ndërsa përfundoi:

“Me ndihmën e Kroacisë mike dhe aleate, duke mësuar nga eksperienca e saj, ne do të sjellim rritje ekonomike dhe punësim për qytetarët tanë.”