Me Kryetarin Atiq, Kurti: Në Mitrovicën e Veriut po shtohen arritjet, po pakësohen problemet
Në Komunën e Mitrovicës së Veriut po shtohen arritjet dhe shërbimet komunale e paralelisht me to po pakësohen sfidat dhe problemet, konstatoi Kryeministri i Kosovës, Albin Kurti, pas një takimi me Kryetarin e kësaj komune, Erden Atiq, duke shtuar se përfitues janë të gjithë qytetarët e përgëzimet i takojnë qeverisjes komunale.
“U njoftova për progresin dhe përgatitjet për fillimin e procesit të legalizimit të objekteve dhe hartimit të planit zhvillimor, për databazën e rasteve sociale që kanë nevojë për mbështetje institucionale, për funksionalizimin e zyrës së Agjencisë për Regjistrimin e Bizneseve të Kosovës, rekrutimin e stafit të ri profesional, fillimin e digjitalizimit të arkivës dhe për planet për funksionalizimin e e-kioskut për shërbime digjitale,” tha Albin Kurti nga ajo që dëgjoi në një mëngjes pune përveç Kryetarit Erden Atiq, edhe Nënkryetarja Katarina Ađančić dhe kabineti i drejtorëve komunalë.
“Diskutuam edhe për projekte dhe bashkëpunime të reja që nxisin zhvillimim ekonomik lokal dhe përmirësojnë mirëqenien e qytetarëve. I jemi mirënjohës kryetarit Atiq dhe nënkryetares Ađančić për përkushtimin në punë, bashkëpunimin e afërt dhe zellin për t’i shërbyer publikes,” bëri të ditur Kryeministri i Kosovës, Albin Kurti, përmes rrjetit social Facebook duke përfunduar:
“Ata kanë mbështetjen time dhe të qeverisë për realizimin e projekteve dhe planeve që në qendër kanë qytetarin, gjithëpërfshirjen dhe zhvillimin.”
Ndryshe, në këtë mëngjes pune me krerët e komunës së Mitrovicës së Veriut i cili u zhvillua në Kryeministri, Albin Kurti shoqërohej nga ministri për Komunitete dhe Kthim, Nenad Rašić, dhe, ministri i Administrimit të Pushteit Lokal, Elbert Krasniqi.
