Me Mark Gjonajn, Berisha: Shqiptarët do votojnë të barabartë, kudo që ata banojnë!
Angazhimi i Partisë Demokratike në mbështetje të mundësimit të votës për diasporën shqiptare në botë, ishte tema e diksutimit që Kryetari i PD, Sali Berisha, zhvilloi në takim me ish-anëtarin e Këshillit Bashkiak të Bashkisë New York dhe Asamblesë së Shtetit New York, Mark Gjonaj, duke i siguruar se PD do të ndërmarrë çdo hap të nevojshëm politik dhe ligjor që shqiptarët të votojnë si qytetarë shqiptarë të barabartë kudo që ata banojnë.
“Të shqetësuar nga niveli tragjik i shpopullimit të Shqipërisë, largimin në 7 vite, sipas EUROSTAT, të 744 mijë shqiptarëve vetëm në hapësirën e BE-së, i theksova se dhunimi i votës së lirë është shkaku më themelor i situatës tragjike që po kalon vendi, ” tha Sali Berisha duke falënderuar Z.Gjonaj për vizitën e tij, ndërsa i shpreh mirënjohjen më të thellë atij dhe të gjithë diasporës shqiptare për kontributin e vyer ndër vite.
“Diaspora shqiptare në SHBA e ka çuar çështjen tonë kombëtare në nivelet më të larta të administratës amerikane. Diaspora është tanimë një realitet global, një forcë drejtuese ndryshimi dhe një aset i paçmueshëm ndaj të cilës, shteti shqiptar ka detyrime të pamohueshme,” shprehet Kryetari i Partisë Demokratike duke shtuar se Zoti Gjonaj nga ana e tij foli gjerësisht për rolin dhe potencialin e madh që ka diaspora, Këshilli Koordinues i Diasporës Shqiptare dhe vendosmërinë e tyre për të kontribuar në mënyrë të gjithanshme për kombin tonë.
“Z.Gjonaj shprehu bindjen tek vlera e votës së diasporës, themel për ndryshimin, zhvillimin, demokracinë; domosdoshmëri për të ardhmen e Shqipërisë. Në këtë kuadër, roli i diasporës do të jetë edhe më kyç kur ajo të marrë të drejta të plota për të votuar,” tha bë fund Kryetari i Partisë Demokratike, Sali Berisha, pas takimit me ish-anëtarin e Këshillit Bashkiak të Bashkisë New York dhe Asamblesë së Shtetit New York, Mark Gjonaj, dhe për këtë qëllim, PD pret që e drejta për të votuar si qytetarë të barabartë shqiptarë të bëhet realitet.
