Me Metën kundër Amerikës!
nga Agim Popoci
Histeria e Ilir Metës kundër vendimit të KPA dhe Ambasadës së SHBA shumë shpejtë u shua nga arsyeja e kësaj histerie, Besnik Muçi, ndonëse u ngritë një ushtri e tërë konstitucionalistësh e çobanësh, lsistësh dhe kuazidemokratësh për të na bindur se Presidenti i Republikës ka të drejtë!
Duke e pranuar në krye të herës se KPK, KPA dhe gjithçka që u prodhua nga Reforma në Drejtësi është degjeneruar nga Kryeministri Edi Rama, ndërhyrja e Ilir Metës në mbrojtje të kësaj Reforme dhe së fundi Gjykatës Kushtetuese e bënë atë edhe më të pështirë.
Pas përbuzjes që iu bë Gjykatës Kushtetuese e cila dhe pranoi këtë Reformë edhe pse linte shumë për të dëshiruar, të gjithë heshtën duke përfshirë këtu Kryetarin e Parlamentit dhe Presidentit aktual të Republikës, për tu shfaqur ditën e gjykimit deri në kufijtë e marrëzisë, ashtu siç bënte krimineli Enver Hoxha kur lajthiti dhe filloi të merret edhe me Gardën e Republikës.
21 Nëntori i vitit 2019 do të mbahet në mend për një mobilizim të pashembullt pas publikimit të vendimit të KPA që e përjashton Besnik Muçin, të cilin Meta e dekretoi si anëtar të Gjykatës Kushtetuese, nga sistemi i drejtësisë. Pa e komentuar vendimin e KPA, pa i parë emisionet dhe lajmet në ekranet televizive nën kujdesin e Ilir Metës, lirisht mund të thuhet se Besnik Muçi është vetëm një nga të larguarit nga sistemi i drejtësisë; Vetë fakti që këtë vetting e bënë ca kalamaj që edhe Kushtetutën nuk e kanë lexuar, këtë vlerësim nuk e bëjnë të pabesueshëm por plotësisht të pabesueshëm, dhe për këtë Muçi duhet të jetë krenar edhe pse mund të qëndrojnë të gjitha akuzat që i vihen në qafë.
Por në asnjë rrethanë, sikur gjithçka që nxjerr nga goja këto ditë Ilir Meta janë të drejta, nuk i japin të drejtën atij dhe askujt në këtë tokë që të ndërsejë halabakë kundër Amerikës vetëm pse japin përmes Ambasadës në Tiranë një propozim për zgjidhjen e ngërçit të krijuar në Gjykatën Kushtetuese.
Ata që janë me Metën kundër Amerikës duhet ta kenë të qartë se sot që shijojmë lirinë dhe pavarësinë që gëzojmë në Ballkan, vetëm një serb injorant mund ta vejë në dyshim sinqeritetin amerikan. Nga Lublana deri në Shkup, është SHBA që vuri rend dhe qetësi në Ballkan, si dhe korrigjoj politikën kaotike të Bashkimit Evropian, duke krijuar për këtë qëllim edhe shtetin e dytë shqiptar.
Ata që janë me Metën kundër Amerikës duhet ta kenë të qartë se Komisioni Venecias në asnjë rrethanë nuk është zgjidhja fatlume për ngërçin e krijuar me Reformën në Drejtësi dhe Gjykatën Kushtetuese së fundi. Por pas ndryshimeve të fundit kushtetuese dhe në mungesë të një institucioni të përshtatshëm ligjor i cili mund të vendos mbi interpretimet e kundërta mbi procesin e emërimit, Shtetet e Bashkuara kanë të drejtë që mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Dhe, kjo e drejtë betonohet në sekondën e parë kur fut hundët Ilir Meta!
Ata që ishin dje me Metën kundër Amerikës për arsye të shkarkimit të Besnik Muçit kishin rastin të shohin sot se vetë Muçi për të ruajtur integritetin e vet dhe të Gjykatës Kushtetuese të Republikës së Shqipërisë, nuk iu bindë ushtrisë së Ilir Metës por iu drejtua kësaj Gjykate pavarësisht hakërrimeve të paimagjinueshme që nxori dje nga goja e një të zemëruari; Dhe Gjykata Kushtetuese e largoi nga radhët e saj! Kot u mundua Ilir Meta ta bindë se po gabon, Besnik Muçi kishte rrugën e ndarë nga Ilir Meta me të tijët kundër Amerikës.
Sot, shqiptarët mund të bien dakord se Besnik Muçit i takon të kërkoj drejtësi edhe pas vendimit të KPA ndonëse është i formës së prerë për shkak të dekretit të Ilir Metës që ka në xhep dhe e bën atë gjyqtar të Gjykatës Kushtetuese.
Por, shqiptarët sot nuk janë dakord të kenë një anëtar të Gjykatës Kushtetuese si Besnik Muçi i cili mendon se nuk ka qytetar shqiptar, pasuria e të cilit mos ketë probleme!
Sot ka shqiptar si Ilir Meta dhe njeriu i tij që punon në Ambasadën e SHBA që mendojnë për një moment se shqiptarëve nuk u duhet Amerika!
Por pikërisht për faktin se ekzistojnë njerëz të tillë si Ilir Meta dhe shërbëtorët e tij, shqiptarëve u duhet Amerika për ta bërë një shtet i cili nuk merr vendime në Beograd.
