Me Nancy Pelosi, Presidentja e Kosovës: Avancim, rrugës euro-atlantike të Kosovës!
Presidentja e Kosovës, Vjosa Osmani në takim me Kryetaren e Dhomës së Përfaqësuesve të Shteteve të Bashkuara, Nancy Pelosi, potencoi rëndësinë e avancimit të rrugës euro-atlantike të Kosovës, tani që sfidat e sigurisë të krijuara nga regjimet autokratike janë gjithnjë e në rritje.
Shtetet e Bashkuara janë aleati dhe partneri më strategjik i Republikës së Kosovës, tha Vjosa Osmani, e cila informoi Kryetaren Pelosi për rreshtimin e qartë të Kosovës me politikat amerikane, në veçanti sa i përket sanksioneve ndaj Rusisë dhe mbështetjes ndaj Ukrainës, thuhet në njoftimin nga Zyra e Presidencës duke shtuar:
“Presidentja Osmani shprehu mirënjohjen për përkushtimin e vazhdueshëm të kryetares Pelosi për t’i përafruar tutje dy vendet tona edhe sot kur kontinenti ynë po ballafaqohet me një kohë sfiduese dhe kur vlerat tona të përbashkëta demokratike dhe paqedashëse janë nën kërcënim.”
Presidentja Vjosa Osmani ka ftuar Kryetaren e Dhomës së Përfaqësuesve të Shteteve të Bashkuara , Nancy Pelosi që ta vizitojë Kosovën, duke e vlerësuar se një vizitë e tillë do të kontribuonte edhe më tej në avancimin e raporteve të shkëlqyeshme e të veçanta ndërmjet Kosovës dhe Shteteve të Bashkuara.
Ndërkohë Presidentja e Kosovës ka zhvilluar takime dhe me kryetarin e Komisionit për Marrëdhëniet me Jashtë në Senatin Amerikan, senatorin Bob Menendez, dhe kryetarin e Komisionit për Punë të Brendshme dhe Çështje Qeveritare, senatorin Gary Peters.
Në takim me kryetarin e Komisionit për Marrëdhëniet me Jashtë në Senatin Amerikan, senatorin Bob Menendez, Vjosa Osmani diskutoi për situatën e krijuar në rajon pas agresionit ushtarak të Rusisë në Ukrainë.
“Dhe, për faktin se do të ketë interesim të vazhdueshëm nga Rusia dhe aleati i saj në rajon, Serbia, që të minohen të arriturat e popullit të Kosovës dhe të arriturat amerikane në vendin tonë,” thuhet në njoftim duke shtuar se u diskutua dhe për mundësitë e rritjes së bashkëpunimit ndërmjet dy vendeve tona në fusha të ndryshme.
Ndërsa në takim me kryetarin e Komisionit për Punë të Brendshme dhe Çështje Qeveritare, senatorin Gary Peters, si mbështetës i Kosovës dhe njohës i mirë i rajonit, Presidentja Vjosa Osmani diskutoi “për rëndësinë e mbështetjes amerikane në kohën kur rajoni ynë po përballet me sfida të krijuara nga satelitët e Rusisë si dhe për rëndësinë e anëtarësimit të Kosovës në NATO dhe organizata të tjera ndërkombëtare.”
