“Dhembja jonë Bac sot ka emrin e Kosovës për lirinë e së cilës flijove rininë, shëndetin, familjen, dhuntinë tënde krijuese. Dhembja jonë Bac sot mban emrin e atdheut tënd, Shqipërisë të cilën e quaje nëna Shqipëri. Bac sot kur po ndahemi nga ti për të fundit herë, të gjithë ne bëjmë këto pyetje, po mos të kishe qenë ti kush do të na mësonte ka do të niseshim në rrugën e lirisë, po mos ishe ti, kush do të na mësonte në udhëkryqet e historisë që të mos na ngatërroheshin rrugët “, tha Novosella duke shtuar se dhembja e pakufi ka emrin e nënës Ajshe, e cila të porositi të mos kujdesesh për të por për nënë Shqipëri.

“Baci jonë i mirë ti më përpara zgjodhe lirinë në burgun se sa burgun në liri të rrejshme. Ti me burgun tënd të papërkulur ishe gjithnjë sepse e ndjeje vetën të lirë aty në raport me veten dhe në raport me idealet tua. Baca Adem sot kur po ndahemi prej teje vetëm na ngushëllon një moment se patëm fatin të jetojmë në epokën tënde”, tha ai.

Pas ceremonisë së varrimit drejtues të institucioneve dhe personalitete tjera vunë kurora lulesh pranë varrit të tij.

Adem Demaçi ndërroi jetë të enjten, në moshën 82 vjeçare.