Më në fund, Lavrov e pranon se cili është qëllimi i Rusisë në Ukrainë
Ministri i Punëve të Jashtme të Rusisë, Sergej Lavrov, në një intervistë për televizionin shtetëror rus “Rusia 24” tha se qëndrimi i Rusisë ka ndryshuar dhe se nuk do të ndërprehet zjarri për shkak të negociatave ndërsa për herë të parë e pranoi se cili ishte qëllimi i vërtetë i pushtimit të Ukrainës.
Shefi i diplomacisë ruse tha se sulmi në Ukrainë ka për qëllim të ndërpres rrugën e “dominimit të plotë të SHBA dhe shteteve tjera perëndimore”.
“Operacioni ynë special ushtarak është menduar të ndaloj zgjerimin e pakuptimtë dhe të pamenduar ndaj dominimit të plotë të Shteteve të Bashkuara dhe shteteve të tjera perëndimore që janë nën SHBA në arenën ndërkombëtare,” tha Lavrov duke shtuar se një dominim i tillë ngrihet me shkelje të rënda të së drejtës ndërkombëtare duke marrë si shembull dhe duke abuzuar sërish me Kosovën.
“Në Kosovë, pa referendum është e mundur të pranohet pavarësia, por në Krime, si rezultat i referendumit, të cilin e kanë vëzhguar qindra përfaqësues objektiv të vendeve të huaja, kjo është e mundur,” tha shefi i diplomacisë ruse duke injoruar krimet serbe në Kosovë, Konferencën e Rambujesë dhe Rezolutën 1244 të Këshilllit të Sigurimit të OKB.
Por, Lavrov, ishte e qartë se kishte dalë në televizionin shtetëror për Putinin dhe jo për të sqaruar njeri se cila është e vërteta në Ukrainë. Dhe, vazhdoi me shembujt e tij të pështirë:
“Në Irak, dhjetë mijë kilometra nga Shtetet e Bashkuara, e imagjinuan kërcënimin për sigurinë e tyre amerikane, e bombarduan, nuk gjetën kurrfarë kërcënimi, madje nuk kërkuan as falje,” tha Lavrov duke harruar ndërhyrjen e tyre ushtarake në Siri dhe përplasjen me të gjitha palët për interes të pasurimit të Vladimir Putinit.
Gjithsesi, Lavrov nuk ndalon me mashtrime:
“E kur neonazistët dhe ultraradikalët janë në kufijtë tanë, krijohen dhjetëra laboratore biologjike me shembullin e Pentagonit, zbatojnë disa eksperimente të cilat kryesisht janë të destinuara në prodhimin e armëve kimike, janë gjetur dokumente që nuk lënë vend për asnjë dyshim, atëherë ky kërcënim është në kufijtë tanë, dhe jo përtej oqeanit,” tha Ministri i Jashtëm i Rusisë, Sergej Lavrov, dhe ashtu si homologët e tij kriminel serb, mohoi krimet ruse ndaj civilëve në Buça dhe Krematorski, duke i quajtur të montuara dhe provokime ndërsa e përfundoi siç e do zakoni rus, me shpifje:
“Një pjesë e njerëzve në Donbasin e shkërmoqur jeton me vite tëra nën neonazistë.”
