Më në fund, lejohet transferimi i Navalnyt në Gjermani

Zv/Drejtori i Spitalit në Omsk, Anatolij Kaliniçenko, ka bërë të ditur se mjekët që u kujdesën për mjekimin e kundërshtarit më të madh të Putinit, Aleksej Navalny, kanë vendosur që ta lejojnë transferimin e tij për kurim të mëtejmë në Gjermani, raportojnë mediat ruse.

“Gjendja e pacientit është stabël dhe meqë kemi kërkesën e familjes për të lejuar tarnsferimin e tij, kemi marrë vendim që ai mund të transferohet në një tjetër spital,” tha para gazetarëve Zv/Drejtori i Spitalit në Omsk, Anatolij Kaljiniçenko, raporton Agjencia ruse e lajmeve Interfax.

“Negociatat për transferimin e Aleksejit kanë nisur nga pika zero. Besojmë se tani Navalny mund të transferohet. Për fat të keq mjekëve iu desht shumë kohë për të marrë këtë vendim. Avioni ishte në pritje që nga mëngjesi, dhe dokumentat ishin gati,” tha përmes rrjetit social Twitter zëdhënësja e tij Kira Jarmish.

“U konfirmua, Navalnyt i lejuan që të fluturoj nga Omski në Berlin,” tha për gazetën gjermane Bild aktivisti Jaka Bizil i cili në mëngjes dërgoi avionin nga Gjeramnia në Omsk.

Ndryshe, Navalny, kritik i ashpër i Presidentit rus Vladimir Putin, është në gjendje të rëndë që nga mëngjesi i djeshëm pasi kishte pirë një çaj në Tomsk, kur dhe mendohet se është helmuar.

Lideri i opozitës ruse filloi të ndjehet keq në avionin drejtë Moskës, i cili më pas bëri ulje emergjente në qytetin siberian Omsk.