Me operatorët turistikë në Divjakë, Basha: Vendimet tona të para, për turizmin!

Në çdo resort numri i pushuesve ishte pothuajse zero. Kështu konstaton Kryetari i Partisë Demokratike, Lulzim Basha, pas takimit të sipërmarrësve dhe operatorëve turistikë të Divjakë që sot po mendojnë seriozisht mbylljen e aktivitetit të tyre dhe të cilët Basha i siguroi se vendimet e para të qeverisë demokratike do të jenë në dobi të ekonomisë dhe turizmit, si masat e para stabilizuese për të vendosur normalitetin në vend.

“Mbyllja e kufijve nga Bashkimi Europian ka sjellë pasoja të rënda, pasi shkaktoi anulimin masiv të prenotimeve nga jashtë. Bizneset në Divjakë kanë zero rezervime për pjesën e mbetur të sezonit turistik. Administratorët më thanë se kishin larguar nga puna mbi 50 përqind të punonjësve. Kjo përkthehet në qindra kryefamiljarë pa rrogë dhe mijëra ekonomi familjare në krizë, si asnjëherë tjetër,” tha Lulzim Basha duke shtuar se biznesi po shkon drejt falimentimit dhe qindra vende pune mbyllen çdo ditë.

Edi Rama planifikon që 1.2 miliardë euro t’i japë për koncesionin e një rruge fantazëm, Milot-Fier. Kjo rrugë në pjesën më të madhe është ndërtuar gjatë qeverisjes së Partisë Demokratike, por Ramavirusit i duhet si alibi për t’i dhuruar miliona euro oligarkëve, në turravrapin e fundit korruptiv të një qeverie në ikje, thekson lideri i opozitës në reagimin e tij përmes rrjetit social Facebook, duke paralajmëruar:

“Ne nuk do të njohim asnjë koncesion apo vendim korruptiv të marrë 12 muaj para zgjedhjeve. Qeveria jonë do të rishqyrtojë ligjshmërinë dhe konfliktin me interesin publik të të gjitha vendimeve që janë marrë.”

“Taksa 9% për biznesin, heqja e “taksës Rama” për naftën dhe moratoriumi 1 vjeçar për inspektoriatet, do të jenë vendimet tona të para në dobi të ekonomisë dhe turizmit. Këto janë masat e para stabilizuese për të vendosur normalitetin në vend,” zotohet Kryetari i Partisë Demokratike, Lulzim Basha, pas takimit të sipërmarrësve dhe operatorëve turistikë të Divjakës duke garantuar se paratë e shqiptarëve nuk do të shkojnë më për oligarkët, për tenderat, koncensionet e PPP-të e tyre, por do të shkojnë për investimeve publike që i shërbejnë ekonomisë, punësimit dhe mirëqenies së qytetarëve ndërsa përfundon:

“Paratë që sot shpërndahen në skema korruptive, do të shkojnë tek fermeri, biznesi i vogël, sipërmarrësi i ndershëm, për të zhvilluar dhe promovuar ekonominë dhe turizmin si gjenerator me potencial të madh për zhvillim dhe punësim.”