Me Palmer dhe Lajçak, Kurti: Bashkëpunimi SHBA-BE, i domosdoshëm në dialogun Kosovë-Serbi

Bashkëpunimi dhe koordinimi në mes të Bashkimit Evropian dhe Shteteve të Bashkuara në procesin e ri të dialogut Kosovë-Serbi është i mirëseardhur dhe i domosdoshëm, tha Kryeministri i Kosovës Albin Kurti sot në takim me Zv/Ndihmës Sekretarin amerikan të Shtetit dhe Të Dërguarin e Posaçëm të SHBA për Ballkanin Perëndimor, Matthew Palmer dhe Përfaqësuesin e Posaçëm të BE për dialogun, Miroslav Lajçak. Ndërkohë Presidentja e Kosovës Vjosa Osmani gjatë takimit me Palmer dhe Lajçak tha se procesi i dialogut në Bruksel duhet të përfundojë me njohjen reciproke mes Kosovës dhe Serbisë.

Kryeministri Kurti gjatë takimit me Të Dërguarit e Posaçëm të SHBA dhe BE për dialogun Kosovë-Serbi, tha se dialogu duhet të jetë i drejtë, parimor dhe në shërbim të popujve dhe paqes e sigurisë së gjithmbarshme. Ai e vlerësoi të rëndësishëm takimin dhe kohën kur po ndodh, në prag të takimit në Bruksel, i paralajmëruar në mesin e qershorit, pas takimeve me liderët e opozitës dhe para diskutimit në Parlament për procesin e kaluar të dialogut, marrëveshjet e arritura në Bruksel dhe nivelin e zbatimit të tyre.

Presidentja e Kosovës Vjosa Osmani gjatë takimit me Zv/ndihmës Sekretarin amerikan të Shtetit amerikan, Matthew Palmer dhe Përfaqësuesin e Posaçëm të BE për dialogun, Miroslav Lajçak, ka ripërsëritur qëndrimin se për Kosovën mbetet thelbësore që në këtë proces të respektohen plotësisht integriteti territorial, rregullimi i brendshëm kushtetues dhe shtetëror, si dhe funksionaliteti i vendit.

Për më tepër, presidentja Osmani theksoi çështjen e personave të zhdukur dhunshëm gjatë luftës së fundit në Kosovë, si prioritet në këtë proces.

“Ne presim që procesi të përfundojë me njohjen reciproke, duke i respektuar këto parime dhe që marrëveshja të jetë plotësisht e zbatueshme,” tha Osmani.

Palmer dhe Lajçak, nga ana e tyre, ritheksuan edhe një herë mbështetjen e tyre të plotë për procesin e dialogut dhe përmbylljen e tij me marrëveshje përfundimtare ndërmjet Kosovës dhe Serbisë.

Presidentja Osmani foli edhe për përqendrimin maksimal të institucioneve të Kosovës në menaxhimin e pandemisë, zbatimin e reformave në fushën e sundimit të ligjit dhe zhvillimin ekonomik të vendit, si prioritete themelore të institucioneve të vendit.

Ajo falënderoi SHBA dhe BE-në për përkrahjen që u kanë dhënë qytetarëve të Kosovës në këtë kohë të vështirë për të gjithë ne. Ajo shprehu mirënjohjen ndaj Bashkimit Evropian për donacionin e vaksinave, dhe shprehu shpresën se edhe SHBA do të ndajë një numër të vaksinave për qytetarët tanë.

Në fund të ditë së parë të vizitës së Zv/Ndihmës Sekretarit amerikan të Shtetit, Matthew Palmer, Ambasada e Shteteve të Bashkuara në Prishtinë i ka vlerësuar konstruktive takimet e sotme me drejtuesit e shtetit të Kosovës dhe Përfaqësuesin e Posaçëm të BE për dialogun, Miroslav Lajçak.

“Zv/Ndihmës Sekretari, Matthew Palmer zhvilloi takime konstruktive me Përfaqësuesin e Posaçëm të BE, Miroslav Lajcak, Presidenten Vjosa Osmani, Kryeministrin Albin Kurti, Zv/Kryeministrin Besnik Bislimi dhe ministren e Punëve të Jashtme, Donika Gervalla-Schwarz,” thekson Ambasada amerikane përmes rrjetit social Facebook.

Ndryshe, Lajçak dhe Palmer ndodhen për vizitë treditore në Kosovë, ku gjatë ditës janë takuar me krerët e shtetit dhe opozitës së Kosovës. Nesër ata do të mbajnë një konferencë për media në Zyrën e Bashkimit Evropian, në orën 10:45.