Me Pendarovskin, Presidentja Osmani: Kosova në NATO, garanci për stabilitetin e rajonit!
Kosova dhe Maqedonia e Veriu kanë vizion të përbashkët për një Ballkan Perëndimor stabël dhe të integruar në BE, tha Presidentja Vjosa Osmani pas takimit në Prishtinë me homologun maqedonë Stevo Pendarovski, ku u tha qartë se përfshirja e Kosovës në NATO përveç se rëndësi strategjike është garanci për stabilitet të Kosovës dhe rajonit.
Në fillim të vizitës së Presidentit të Maqedonisë së Veriut, Stevo Pendarovski, në Kosovë, Presidentja Vjosa Osmani rikonfirmoi përkushtimin për vazhdimin e marrëdhënieve të shkëlqyeshme me Maqedoninë e Veriut.
“Shqiptarët në Maqedoninë e Veriut, sipas presidentes Osmani janë urë lidhëse ndërmjet të dy shteteve dhe shtyllë e stabilitetit, por edhe e procesit të integrimit evropian të Maqedonisë së Veriut,” thekson Zyra e Presidentes së Kosovës përmes komunikatës ndërsa ka falënderuar Presidentin Pendarovski për përkushtimin e tij personal për raportet e shkëlqyeshme ndërmjet dy shteteve.
“Presidentja Osmani shprehu mirënjohjen për mbështetjen dhe bashkëpunimin nga Maqedonia e Veriut, duke theksuar rëndësinë e përpjekjeve të përbashkëta për stabilitetin rajonal. Presidentja Osmani tha se me mbështetjen e shteteve mike sikurse Maqedonia e Veriut, Kosova mund të avancojë në rrugën e integrimit evropian. Në këtë kontekst, Presidentja Osmani tha se anëtarësimi në Këshillin e Evropës është në funksion të mbrojtjes së të drejtave të njeriut të të gjithë qytetarëve të Kosovës pa dallim,” thekson Zyra e Presidentes përmes komunikatës.
Kosova, sipas Vjosa Osmanit, ka dëshmuar angazhim serioz në procesin e reformave rrënjësore, ndaj meriton ta marrë statusin e vendit kandidat në BE. Dhe, Maqedonia e Veriut nuk është vetëm fqinje e Kosovës, por edhe partnere në shumë procese.
“Procesi i integrimit evropian është prioritet që na bashkon dhe në këtë rrugë ne do të vazhdojmë ta ndihmojmë njëra-tjetrën,” thekson Zyra e Presidentes së Kosovës, Vjosa Osmani duke përfunduar:
“Në këtë kontekst, sipas presidentes Osmani, përfshirja e Kosovës në PfP, e më pas në NATO ka një rëndësi strategjike dhe gjithashtu është garanci për stabilitet jo vetëm të Kosovës, por edhe të rajonit. Të dy liderët pohuan se ekziston potenciali për thellimin e bashkëpunimit në fushën e shkëmbimit tregtar, kulturor, të shëndetësisë, arsimit, bujqësisë, turizmit, teknologjisë informative dhe fusha të tjera të interesit të përbashkët”, theksohet në komunikatë.
Pas takimit zyrtar me Presidenten Vjosa Osmani, Presidenti i Maqedonisë së Veriut, Stevo Pendarovski është takuar me Kryeministrin Albin Kurti.
