Me Presidentin Trump, Kurti: Do të vazhdojmë zgjerimin e bashkëpunimit me SHBA

Dëshirojmë dhe jemi të gatshëm që ta vazhdojmë zgjerimin e bashkëpunimit, jo vetëm në aspektin diplomatik, por edhe në aspektin e sigurisë e të energjetikës, tha sot Kryeministri i Kosovës, Albin Kurti, duke sqaruar raportin me Shtetet e Bashkuara pas zgjedhjes së Donald Trumpit si president i ri i SHBA.

“Presidenti i ardhshëm i SHBA-së, që ishte edhe president i kaluar i SHBA-së, në një letër urimi që i pati dërguar një pararendësi tim ka vendosur në thelb njohjen reciproke si diçka qendrore në raportet e ardhshme normale midis Kosovës e Serbisë, dhe ne dëshirojmë dhe jemi të gatshëm e të interesuar që ta vazhdojmë e ta zgjerojmë këtë bashkëpunim, jo vetëm në aspektin diplomatik, por edhe në aspektin e sigurisë e të energjetikës,” tha Albin Kurti pas vizitës në Institutin e Krimeve të Kryera gjatë Luftës në Kosovë, ku në shoqërinë e Nënkryetares së Parlamentit, Saranda Bogujevci, dhe ministres së Drejtësisë, Albulena Haxhiu, u prit nga Drejtori ekzekutiv i këtij instituti, Atdhe Hetemi.

“Është punë jetike e vendimtare si për historinë tonë, ashtu edhe për për drejtësinë, meqenëse në njërën anë ne kuptojmë të vërtetën historike në përmasën e saktë përmes këtyre dokumenteve, ndërkaq, në anën tjetër, ky paraqet një vend, adresë shumë të rëndësishme, por drejtësinë vendore e ndërkombëtare,” tha Kryeministri i Kosovës, Albin Kurti duke përgëzuar punën e Institutit, për ruajtjen  e materialeve dhe dokumenteve, si dhe për planin e dixhitlaizimit të tyre, ku gjithsej janë grumbulluar prej 67 burimeve, pjesë e të cilës janë ministritë, komunat, shoqatat, koleksionistë të ndryshëm etj.