“Më shikoi në sy dhe tha…”, Reagimi, Kurti: Asnjëherë nuk i kam thënë…

“Ai më shikoi në sy dhe tha se ata do ta largojnë taksën!” Kështu e ka përshkruar I Dërguari i Presidentit Trump në dialogun Kosovë-Serbi, Richard Grenell, premtimin që i kishte dhënë tashmë Kryeministri i shkarkuar i Kosovës, Albin Kurti, por nuk vonoi shumë dhe ky i fundit e mohoi ndërsa përshëndeti deklarimin e qartë të Ambasadorit Grenell kundër planeve për shkëmbim territorial.

“Me ambasadorin amerikan në Berlin, z. Richard Grenell, jam takuar dy herë. Takimi i parë ishte më 9 tetor 2019, në ora 13:45, në Ambasadën e ShBA-ve në Prishtinë. Takimi i dytë ishte më 23 janar 2020, në ora 10:30, në selinë qendrore të LVV. Në takimin e parë me mua ishte z. Glauk Konjufca. Në takimin e dytë me mua ishin z. Glauk Konjufca dhe znj. Fitore Pacolli-Dalipi. Të dy herët, z. Grenell e kam shikuar në sy. Por, asnjëherë nuk i kam thënë që do ta heqim tarifën 100% pa reciprocitet,” tha Albin Kurti në reagimin e tij përmes rrjetit social Facebook ndërsa për deklaratën rreth shkëmbimit të territoreve shtoi:

“Është për t’u përshëndetur dhe inkurajues deklarimi i qartë i sotëm i Ambasadorit Grenell kundër planeve për shkëmbim territorial.”

Ndryshe, I Dërguari i Presidentit Trump në dialogun Kosovë-Serbi, Richard Grenell, sot gjatë një interviste për mediat kosovare ndërsa sqaroi marrëdhëniet me Kryeministrin e shkarkuar Albin Kurti tha: “Ai më shikoi në sy dhe tha se ata do ta largojnë taksën!”