Me Stoltenberg, Kurti: Kosova në NATO, rajoni dhe Evropa më e sigurt!

Zhvillimet në Kosovë dhe rëndësia e NATO-s dhe KFOR-it për stabilitet në Ballkanin Perëndimor, ishin temë e takimit të Sekretarit të Përgjithshëm të NATO-s, Jens Stoltenberg, me Kryeministrin e Kosovës në Bruksel, ku Albin Kurti tha se prezenca e Aleancës në Kosovë është e domosdoshme për paqen dhe sigurinë ndërsa anëtarësimi i Kosovës në NATO do ta bënte rajonin dhe Evropën më të sigurt

”Mirëprita Albin Kurtin, për të diskutuar zhvillimet në Kosovë dhe rëndësinë e NATOs dhe KFOR-it, për stabilitet në Ballkanin Perëndimor. NATO mbështet përpjekjet për të riaktivizuar bisedimet midis Prishtinës dhe Beogradit. Dialogu është mënyra e vetme për të arritur një zgjidhje të qëndrueshme politike,” tha Sekretari i Përgjithshëm i NATO-s ndërsa Kryeministri Kurti tha se se anëtarësimi i Kosovës në këtë Aleancë do ta bënte rajonin dhe Evropën më të sigurt.

“NATO është aleanca më e mirë e sigurisë që bota ka parë. Në takim me Sekretarin Stoltenberg theksova se prezenca e saj në Kosovë është e domosdoshme për të mbajtur paqen dhe për të ofruar siguri, dhe anëtarësimi i Kosovës në NATO do ta bënte rajonin dhe Evropën më të sigurt,” tha Kurti përmes rrjetit social Twitter.

Ndryshe, sot në Bruksel, Albin Kurti do të takohet me Presidenten e Komisionit Evropian, Ursula von der Leyen, me komisionerin për Zgjerim dhe Fqinjësi, Oliver Varhelyi si dhe me Përfaqësuesin e Lartë për Politikë të Jashtme dhe Siguri pranë BE-së, Josep Borrell. Gjithashtu, Kryeministr Kurti do të marrë pjesë në një seancë të Komisionit për Politikë të Jashtme pranë Parlamentit Evropian.

Kryeministri i Kosovës, Albin Kurti, gjatë vizitës së tij në Bruksel, shoqërohet nga dy zëvendësit e tij, Donika Gërvalla dhe Besnik Bislimi.