Me të dërguarin për Tregti, Kurti: Mbretëria e Bashkuar, partner i domosdoshëm i Kosovës!
Mbretëria e Bashkuar është partner i domosdoshëm i Kosovës, tha Kryeministri Albin Kurti në takim me të dërguarin e Kryeministrit britanik për Tregti për Ballkanin Perëndimor, Martin Vickers, ku dhe i shprehu falënderimin për ndihëm dhe mbështetjen që kjo Mbretëri ka treguar para, gjatë dhe pas luftës.
Në këtë takim Albin Kurti foli edhe për Ligjin për Gjykatën Komerciale për çka tha se ky ligj do të rrisë sigurinë për investitorët dhe bizneset.
“Zgjedhjet demokratike të para një viti, sollën legjitimitet e stabilitet institucional. Kjo ndihmon shumë dhe po rezulton në rritje të bashkëpunimit ekonomik, tregti dhe investime,” tha Kryeministri Kurti në takim me Vickers, i cili vlerësoi veprimet e Qeverisë së Kosovës në luftimin e korrupsionit.
“Fakti që Kryeministri Johnson e ka emëruar një të dërguar për Ballkanin Perëndimor tregon se e marrim shumë seriozisht rajonin. Edhe pse nuk jemi më pjesë e Bashkimit Evropian, të jeni të sigurt se ne do të vazhdojmë t’u qëndrojmë afër dhe të ndihmojmë,” tha z.Vickers.
Lidhur me mundësitë e rritjes së bashkëpunimit ekonomik ndërmjet të dyja vendeve, Kurti veçoi potencialin e mërgatës së madhe që ka Kosova në Mbretërinë e Bashkuar dhe që ata mund të jenë si urë lidhëse.
Kryeministri Kurti foli dhe për potencialin e Kosovës në fushën e teknologjisë së informacionit dhe të komunikimit, TIK, procesimin e drurit dhe të metalit dhe bujqësinë dhe mundësitë e lidhjes së sistemit të edukimit me tregun e punës, nëpërmjet një sistemi të zhvilluar të edukimit dual.
Duke biseduar për ballafaqimin me pandeminë COVID-19, Albin Kurti tha se dy të tretat e popullsisë të moshës mbi 16 vjeç tashmë janë të vaksinuar, ndërsa po vazhdon vaksinimi edhe me dozën përforcuese.
Ndërkohë i dërguari i Kryeministrit britanik për Tregti për Ballkanin Perëndimor, Martin Vickers, ka zhvilluar takim edhe me Presidenten e Kosovës, Vjosa Osmani dhe Kryetarin e Parlamentit, Glauk Konjufca.
Në takim me Presidenten e Kosovës është diskutuar për marrëdhëniet ndërmjet dy shteteve, të cilat u vlerësuan të shkëlqyeshme me mundësinë e thellimit të mëtejme të tyre, ku Vjosa Osmani vlerësoi dhe ndihmën e Mbretërisë së Bashkuar për Kosovën, duke shfaqur shpresë për intensifikimin e saj.
Në këtë kontekst, Presidentja Osmani ka shfaqur gatishmërinë për rritjen e bashkëpunimit në fushën e ekonomisë dhe mbrojtjes ndërsa ka shtuar se është mirë që lidhjet historike ndërmjet dy shteteve të zbërthehen në mundësi ekonomike.
Institucionet kosovare, e ka informuar Presidentja Osamni të dërguarin për Tregti për Ballkanin, Vickers, se kanë bërë përparim në sundimin e ligjit dhe krijimin e mjedisit të përshtatshëm për investitorët e huaj.
