Me të përndjekurit politik, Bardh Spahia: Sot historia na thërret edhe një herë për revolucion
Kandidati i koalicionit “Shtëpia e lirisë” për zgjedhjet e 6 Marsit në Shkodër, Bardh Spahia, para të përndjekurve politik tha se sot historia na thërret edhe një herë të bëhemi bashkë për të ba edhe një herë revolucionin që presin gjithë shqiptarët dhe që do të nis me patjetër nga Shkodra, për mbrojtjen e votës së lirë, lirisë, pluralizmit opozitarizmit të vërtetë, pa të cilin një vend demokratik nuk mund të ekzistoj.
“Ju falemnderit shumë për prezencën edhe pse koha nuk ishte e mirë. Në emrin tuaj, dëshiroj të falënderoj edhe liderin historik të PD, Prof.Dr.Sali Berishën, për mbështetjen e vazhdueshme për Shkodrën dhe shkodranët. Unë në fakt ndihem krenar, i nderuar, por e ndjejë edhe peshën e madhe të barrës për përfaqësimin e një shtrese që e ndjejë thellësisht timen, për historikun e familjes, babait tim dhe paraardhësve të mi.
Sigurisht që Shkodra dhe shkodranët, më shumë se kushdo tjetër e kanë të shënueme me germa të arta, historinë jo vetëm të Shkodrës por të gjithë Shqipërisë, duke filluar që në orët e para të regjimit diktatorial komunist, edhe rezistencën ndaj tij, me sakrifica të jashtëzakonshme nga më esktremet, shumë shkodranë e paguan me jetë rezistencën ndaj regjimit komunist, shumë të tjerë e paguan me burgosje, internime dhe persekutime nga më të ndryshmet, jo më kot Shkodra e mban flamurin e rezistencës ndaj regjimit komunist dhe në fakt e keni tregu me vepra se jeni trashëgimtarë të vërtetë të atyre burrave dhe grave të cilët për ideale, bindje për vlerat që përfaqësonin nuk pranuan asnjëherë të bënin kompromis,” tha Bardh Spahia duke i bërë thirrje të përndjekurve politik dhe qytetarëve të ndershëm të bashkohen në revolucionin që presin shqiptarët, dhe që sipas nis duhet të nis nga Shkodra:
“Unë mendoj se në momentin ku jemi sot historia na thërret edhe një herë të bëhemi bashkë të gjithë Ne, shtresa e persekutumve po edhe gjithë qytetarët e ndershëm të këtij vendi për të ba edhe një herë revolucionin që presin gjithë shqiptarët dhe që do të nis me patjetër nga Shkodra, për mbrojtjen e votës së lirë, lirisë, pluralizmit opozitarizmit të vërtetë, pa të cilin një vend demokratik nuk mund të ekzistoj,” tha kandidati i koalicionit “Shtëpia e lirisë për Shkodrën, Bardh Spahia, ndërsa lideri historik i PD, Sali Berisha, duke cituar shprehjen e Ronald Regan se liria do një gjeneratë për t’u zhdukur, tha se zgjedhjet e 6 marsit janë shumë të rëndësishme.
“Qëndresa e njeriut për dinjitetin e tij, për vlerat. Kjo është një trashëgimi e jashtëzakonshme, një trashëgimi e shkëlqyer që ata qindra e mijëra burra e gra, që ranë për të mos u harruar dhe vuajtën në burgjet e kampet e diktaturës, lanë këtë mesazh të madh. Historinë e kombeve e ka përcaktuar raporti me të vërtetën. Nëse shqiptarët do kishin pasur një raport me të vërtetën si shkodranët, historia e tyre do kish qenë krejt tjetër, do kishte qenë histori lirie dhe jo histori e diktaturës më staliniste të Europës.” tha Sali Berisha para të përndjekurve politik në Shkodër duke shtuar:
“Ne kemi ardhur në një situatë ku kemi një regjim të bazuar te krimi, droga dhe vjedhja, por edhe te trashëgimia e etërve të tij. Rama bëri përpjekje të maskuar për rehabilitimin e diktatorit. I ati i tij, që ka firmën për varjen në litar të Havzi Nelës, është nderuar me emrin e një rruge në Durrës.
Sot vota është bërë fiktive nga ky regjim. Ndaj dhe ne e nisëm betejën tonë me rikthimin e votës. E nisëm së pari në forcën tonë politike dhe sollëm kandidatë para jush, ata që u votuan me votën e lirë të demokratëve, jo të emëruar,” tha lideri historik i PD, Sali Berisha, duke përfunduar:
“Po bëjmë gjithçka që t’i hapim shtegun lirisë, të rivendosim liritë, të rikthejmë votën. Këto zgjedhje janë të një rëndësie shumë të madhe, ku revolucioni paqësor të gjejë mbështetjen për të mbjellë shpresë dhe besim, sidomos te rinia shqiptare. Kam shëtitur në këto gjashtë rrethe këto ditë dhe kudo konstaton shkretim dhe largim të të rinjve. Duhet të bëjmë gjithçka që të kthejmë shpresën!”
