Media gjermane, rusët masivisht po ikin në Beograd

Në protestën e fundit kundër luftës në Ukrainë, e cila i zhvillua në Beograd, kishte shumë rus të ardhur, raporton gazeta gjermane Frankfurter rundschau. Në mesin e tyre ishte dhe njëri i cili i binte çelos në orkestrën e Sankt Petersburgut, i cili u largua nga puna pasi shpërtheu lufta.

“Më larguan nga puna sepse para kolegëve dhashë mendimin tim për luftën,” tha ai për gazetën gjermane duke sqaruar se familja e mamasë dhe ajo e bashkërshortes janë nga Ukraina.

“Në fakt, që nga aneksimi i Krimesë kemi dashur të emigrojmë nga Rusia. Lufta në Ukrainë ishte pika që derdhi gotën.“

Mijëra rusë që tani emigrojnë, shkruan Frankfurter rundschau, tani janë në Beograd.

“Rusëve nuk u duhet viza për tu futur në Serbi. Serbia, kandidate për BE, lëviz në mes të Lindjes dhe Perëndimit dhe nuk merr pjesë në sanksionet e BE kundër Rusisë. Kjo është dhe arsyeja që Air Srbija njëra ndër kompanitë e ralla evropiane që fluturon drejt Moskës dhe Sankt Petersburgut,“ shkruan gazeta gjermane.

Me Stambollin, Jerevanin dhe Tbilisin, edhe Beograd u bë destinacion i preferuar për rusët me arsimim të lartë. Nga fillimi i muajit mars më shumë se 300 kompani, kryesisht nga sektori i IT, kanë transferuar selitë e tyre nga Rusia ose Ukraina në Serbi.

Në bankat e Beogradit thonë se gjithnjë e më shumë rus po hapin llogari bankare, dhe sipas mediave vlerësohet se ka nga 20.000 deri në 30.000 rusë të ardhur.

Sasha Seregina, nga Samara, jeton në Beograd që dhjetë vite. Ajo është njëra nga iniciatoret e lëvizjes “Rusët, Ukrainasit, Bjellorusët dhe Serbët së bashku kundër luftës.“

Për Frankfurter rundschau thotë se rusët që vijnë mund të jenë goditje e mirë për Serbinë, siç ishin ata që erdhën pas Revolucionit të Tetorit më 1917. Seregina thotë se kryesisht vijnë nga shtresa e mesme ose e lartë, por që ka edhe pasoja negative:

“Në Beograd është gjithnjë e më e vështirë të gjendet një banesë me një çmim modest.“

“Rusët po i çojnë çmimet e pasurive të paluajtshme që aktualisht janë të larta,” thotë një këshilltare tatimore për gazetën gjermane.

“Kam frikë se njerëzit me të ardhura normale së shpejti nuk do të mund të gjejnë banesë për vete.“

Siç raporton Frankfurter rundschau, të ardhurit në Serbinë rusofile nuk përballen me paragjykime, për dallim nga ata që shkojnë në ekzil perëndimor. Në Serbi nuk kanë pse të arsyetohen për luftën e Putinit të cilën në pjesën më të madhe e gjykojnë. Në vend të kësaj, i mundon një fenomen krejtësisht tjetër: Në Beograd përballen me ithtarë të Putinit.“

Muzikanti nga Sankt Petersburgu thotë se i vjen mirë që në Beograd protestohet kundër luftës, por është i shokuar se këtu shiten bluza me portretin e Putinit dhe që njerëzit i mbajnë me dëshirë.

Për shkak të bombardimeve të NATO-s dhe luftës në Kosovë shumë njerëz këtu kanë qëndrime absurde mbi luftën në Ukrainë,“ thotë ai.

“Për ta armiku i armikut është mik. E mbështesin Putinin si kundërshtar të NATO-s dhe luftën në Ukrainë si kundërsulm.“

Frankfurter rundschau thekson se beogradasit e sapopjekur rus në rrjetet sociale Facebook dhe Telegram shumë pak flasin për luftën dhe shumë më shumë për çështje praktike: si të hapet një llogari bankare, ku ti çojnë fëmijët në shkollë dhe cilat janë restorantet e mira, transmeton DW.

Muzikanti nga Sankt Petersburgu nuk e din se sa do të jetë në ekzil.

“Jeta po shkon disi, por sigurisht se nuk do të kthehem në Rusi deri sa Putin është në pushtet.“