Media spanjolle, Rama: Brenda javës presim 1 mijë afganët e parë!

Rreth 1 mijë refugjatë afganë pritet të vijnë brenda kësaj jave në Shqipëri. Këtë e ka konfirmuar për median spanjolle “El Periodico” kryeministri Edi Rama duke saktësuar se do të mbërrijnë gazetarë, punonjës social, mësues dhe bashkëpunëtorë të trupave diplomatike amerikane.

Shqipëria dhe Kosova, shkruan “El Periodico” janë dy vende të vogla në Europë të cilat kanë pranuar të strehojnë refugjatët që largohen nga Afganistani. Krahas Kosovës dhe Shqipërisë, edhe Maqedonia e Veriut ka pranuar strehimin e afganëve në vendin tonë ndërsa Ministri i Jashtëm i Greqisë e ka bërë të qartë se vendi i tij nuk mund të bëhet sërish portë pritëse për refugjatët nga Afganistani.

Ndërkohë Kryeministri Edi Rama ka reaguar me një postim në “Twitter” pas debatit që ka shpërthyer për ardhjen e afganëve në Shqipëri.

“Është kaq shqetësuese të lexosh se Shqipëria po i strehon afganët vetëm sepse na kërkuan SHBA, pasi është qesharake t’u kthesh kurrizin atyre dhe të fajësosh vetëm SHBA. Ne të gjithë ishim atje si NATO dhe këta njerëz ishin atje për ne, sepse besonin në idealet për të cilat qëndrojnë SHBA dhe BE.

Shqipëria po e bën atë jashtë përgjegjësisë së saj si një vend i NATO -s dhe për shkak të asaj që jemi. Ne mund të mos jemi të pasur, por ua kemi borxh miqve tanë afganë në nevojë dhe i detyrohemi traditës sonë, të kaluarës sonë të afërt si refugjatë, dhe gjithashtu për kujtesën që fëmijët tanë do të trashëgojnë.,” tha Edi Rama në reagimin e tij përmes rrjetit social Twitter duke përfunduar:

“Largimi nga këto vlera themelore është largimi nga më e mira e vetes sonë,  historisë sonë dhe i idealeve që bota demokratike supozohet të promovojë jo vetëm me fjalë, por edhe me vepra.”

Ndryshe, sot pritet që në Aeroportin e Rinasit të mbërrijnë rreth 300 afganët e parë, që pritet të strehohen në Qendrën e Studentëve në Tiranës si dhe hotelet e kryeqytetit dhe Durrësit.