Meja na përkujton çmimin që paguam për lirinë!

Kryetari i Komunës së Gjakovës, Ardian Gjini, nga tubimi në Mejë deklaroi se kjo datë na përkujton të gjithëve çmimin e shtrenjtë që Kosova e ka paguar për lirinë dhe shtetin që gëzojmë sot.

Ai tha se ata që shumë prej atyre që janë përgjegjës për masakrën e Mejës nuk janë dënuar fare, ndërsa ata pak vetë që kanë dalë para gjykatës kanë marrë dënime simbolike.

Ky fakt, sipas Gjinit, po i shton dhimbjen familjarëve të të pagjeturve.

Kryetari i Komunës së Gjakovës tha se një tjetër shqetësim është mos zbardhja e fatit të të pagjeturve.

Gjini deklaroi se populli i Kosovës nuk ka bërë krime kurrë dhe as nuk ua ka kthyer me të njëjtën monedhë.

Ambasadori Kosnett: Ata që kryen krime duhet të gjykohen

Ambasadori amerikan, Philip S. Kosnett, tha se realiteti i krimeve në Mejë është shumë i tmerrshëm.

“Askush mos të dyshojë sa e thellë apo e qëndrueshme është miqësia mes Shteteve të Bashkuara të Amerikës dhe Kosovës. Mbështetja e Amerikës ndaj qëllimit për paqe, drejtësi dhe mbarësi për Kosovën dhe fqinjët e Kosovës mbetët e qëndrueshme. Përkushtimi i Amerikës për të ardhmen e Kosovës paraqet një trashëgimi të thellë për ata qe vdiqën qe Kosova të jete e lirë”, tha ai.

Ambasadori Kosnett tha se Kosova dhe vendet fqinje duhet të pranojnë të diskutojnë për të kaluar, duke nënkuptuar se për këtë Serbia të pranojë fajësinë për krimet e kryera para 20 vitesh, ndërsa edhe në Kosovë të gjykohen ata që dyshohen për krime.

“Per hir të gjeneratave që vijnë pas e nxis popullin e Kosovës dhe fqinjët tuaj të pranoni dhe të diskutoni drejtpërdrejtë për çastet e errëta të historisë suaj te përbashkët. Për disa kjo do të thotë pranim të realitetit të fushatës së spastrimit etnik të sponsorizuar nga regjimi i Millosheviqit, qe rezultoi me vrasjen dhe zhdukjen e mijëra dhe për t’u siguruar qe përgjegjësit të japin llogari të plotë. Për popullin e Kosovës duhet të nënkuptojë qe ju dhe demokracia juaj t’i përmbahet një parimi më të lartë dhe të sigurojë llogaridhënie për të gjithë ata individë qe kanë kryer krime gjatë dhe pas luftës përkundër realitetit të hidhur se shumë fajtorë tjetër kund i janë shmangur drejtësisë deri tash”, tha Kosnett.

Sipas tij, duhet një përkushtim më i madh nga Kosova dhe Serbia për t’i gjetur dhe kthyer trupat e te pagjeturve duke punuar ne mirëbesim me bashkësinë ndërkombëtare për të bërë publike dhe për të vepruar në bazë të gjitha informatave në dispozicion.

Thaçi: Ndëshkimi i gjenocidit serb është zero

Presidenti i vendit, Hashim Thaçi, në fjalën e tij në tubimin në 20-vjetorin e Masakrës së Mejës, deklaroi se Serbia ende nuk është ndëshkuar për gjenocidin në Kosovë.

“Sot shënojmë ditën e të pagjeturve, kaluan 20 vite dhe pasojat e luftës nga shteti i Serbisë janë të freskëta. Një gjë është e qartë, Serbia kreu spastrim etnik dhe gjenocid në Kosovë. Për fat të keq duhet të themi botërisht as nga drejtësia lokale as ndërkombëtare nuk u ndëshkua. Ndëshkimi i gjenocidit serb është zero. Qytetarët e duan drejtësinë. Fati i të pagjeturve duhet të zbardhet pavarësisht etnisë”, deklaroi Thaçi.

Kreu i shtetit tha se të gjithë kishin shpresuar që në dialogun e Brukselit çështja e të pagjeturve do të ishte pika e parë, por Serbia e ka kushtëzuar këtë proces.

“Kishin shpresuar qe në dialogun e Brukselit çështja e të pagjeturve do te ishte pika e parë, po Serbia e ka kushtëzuar këtë proces, e Kosova nuk do të pranojë kushtëzime as në takimin e Berlinit. Prezenca e ambasadorit amerikan lehtëson dhembjet për familjet e të pagjeturve”, tha ai.

Thaçi falënderoi SHBA-të për mbështetjen ndaj Kosovës duke shtuar se do të jemi çdo herë mirënjohëse.

Haradinaj: Me ligjin e ri do të rregullohet statusi i të zhdukurve

Ndërsa Kryeministri i Kosovës, Ramush Haradinaj në kompleksin memorial në Mejë në Ditën e të pagjeturve të luftës tha se një ligj i ri është në diskutim publik që ka për qëllim që të rregullohet statusi i personave të zhdukurve dhe martirëve të kombit.

“Ligji për personat e zhdukur është ligj i ri i cili është në diskutim publik, qëllimi kryesor është që të rregullohet statusi i personit të zhdukur dhe martirëve të kombit. Me ligjin e ri nuk ka mekanizma që do të ndalojnë pensioni i familjeve të zhdukurve pas gjetjes si ka ndodh deri me tani. Me 25 prill 2019 është publiku, afati i diskutimit është deri me 17 maj dhe për 15 ditë dërgohet në Qeveri e që i bie që nga gjysma e qershorit të jetë në parlament,” tha Haradinaj duke u shprehur para familjarëve dhe qytetarë të tjerë se këtë ligj do të ketë rritje të mbështetjes shëndetësore, në arsim, lehtësira doganore e të tjera shërbime komunale ndërsa përfundoi:

“Me ligjin e ri ka rritje të mbështetjes shëndetësore, mbështetjes në arsim, e drejta e bursës dhe sistemit në konviktin, në shërbimet sociale, lehtësime dogane, lehtësira në rrymë e shërbime të tjera komunale. Familje do të kenë përkrahje të dinjitetshme, meritore dhe institucionale”, ka përfunduar Haradinaj.

Ndryshe, ajo që sot njihet si Lëndina e Pikëllimit në Mejë, forcat kriminale serbe kanë kryer njërën ndër masakrat më të mëdha të luftës së fundit në Kosovë duke vrarë 376 persona.