Memli Krasniqi rizgjidhet kryetar i PDK-së
Në Konventën e Përgjithshme të Partisë Demokratike e Kosovës, sot Memli Krasniqi është rizgjedhur Kryetar i PDK-së.
Pas zgjedhjes, Memli Krasniqi ka falënderuar delegatët e pranishëm për besimin e dhënë, për të vazhduar së bashku punët e mira për Kosovën.
“Faleminderit shumë, për besimin. Faleminderit për mbështetjen. Faleminderit që nderin dhe përgjegjësinë më të madhe jetësore ma dhatë edhe sot sepse kur jam bashkuar për herën e parë në PDK në pranverën e vitit 2004 nuk e kam ëndërruar e as nuk e kam pasur ambicie të jem kryetar i partisë së Hashim Thaçit dhe Kadri Veselit,” tha Kryetari i PDK-së para delegatëve të Konventës së njëmbëdhjetë duke u zotuar se do të angazhohet për ta rikthyer PDK-në si partinë e parë në vend ndërsa përfundoi:
“Krejt çka di dhe krejt çka mundem do ta bëj për ta rikthyer Partinë Demokratike të Kosovës aty ku e ka vendin, si partinë më të madhe dhe udhëheqëse të Republikës së Kosovës.”
Në Konventën e Përgjithshme, PDK ka miratuar Deklaratën Politike prej 15 pikave, ku riafirmon përkushtimin për ta udhëhequr Kosovën drejt rimëkëmbjes dhe zhvillimit të qëndrueshëm ekonomik, forcimit të demokracisë dhe integrimit të plotë euro-atlantik.
Përmes deklaratës politike, PDK u ka bërë thirrje qytetarëve në Kosovë dhe në mërgatë, t’i bashkohen në misionin e shpresës dhe zhvillimit për të ardhmen e Republikës së Kosovës.
Partia Demokratike e Kosovës kërkon dhe angazhohet që urgjentisht të themelohen institucionet qendrore, të cilat do ta marrin me përgjegjësi politike e qytetare detyrën e qeverisjes së vendit.
PDK ka filluar mobilizimin e të gjitha strukturave në çdo nivel të organizimit partiak për Zgjedhjet Lokale të 12 tetorit, dhe zotohet për t’iu ofruar qytetarëve në të gjitha komunat modelin e qeverisjes efikase, që kryen punë dhe i mban premtimet.
Në deklaratë theksohet se PDK angazhohet për të garantuar pavarësinë e sistemit të drejtësisë, mediave dhe agjencive të pavarura, duke konsideruar se çdo tentim për të zbehur këto shtylla të shoqërisë, cenon themelet e demokracisë dhe qon vendin kah autokracia.
PDK ka shprehur indinjatë të thellë lidhur me mënyrën e zhvillimit të procesit gjyqësor në Dhomat e Specializuara ndaj Hashim Thaçit, Kadri Veselit, Jakup Krasniqit, Rexhep Selimit dhe të të akuzuarve të tjerë.
PDK angazhohet ta rikthejë rreshtimin strategjik me NATO-n dhe me SHBA-në, si dhe kërkon rikthimin e qëllimit për marrëveshje përfundimtare me njohje reciproke në kuadër të dialogut Kosovë-Serbi.
Po ashtu, PDK angazhohet që të gjithë punonjësit e sektorit publik të kenë paga që sigurojnë mirëqenie dhe dinjitet për ta dhe familjet e tyre, si dhe zotohet për kujdes të veçantë për kategoritë e dala nga lufta, si dhe për pensionistët dhe kategoritë e tjera që mbështeten nga buxheti i shtetit.
PDK mbetet e përkushtuar për fuqizimin e grave dhe të rinjve, duke synuar përfaqësimin e barabartë gjinor – 50/50 – në të gjitha nivelet e vendimmarrjes.
