Menaxhimi financiar dhe risku, KLSH: Punonjësit kanë mungesë të njohurive mbi ligjin

Një auditim në Ministrinë e Drejtësisë nga Kontrolli i Lartë i Shtetit, KLSH, me fokus funksionimin e strukturave të auditimit dhe menaxhimin financiar nxori në pah se punonjësit nuk kanë njohuri të mjaftueshme mbi këto aspekte. Referuar raportit final KLSH nënvizon se “menaxherët dhe punonjësit në Ministrinë e Drejtësisë kanë mungesë të njohurive për ligjin e menaxhimin financiar dhe kontrollin, mungesë të theksuar të njohurive në menaxhimin e riskut, si dhe monitorimi i tij. Nga institucioni konstatuam se janë organizuar trajnime me qëllim njohjen dhe shkëmbimin e përvojave mbi praktikat më të mira në fusha të ndryshme, por nuk janë organizuar trajnime mbi njohuritë e ligjit të MFK-së, për rritjen e kapaciteteve profesionale të menaxherëve dhe punonjësve në lidhje me funksionimin e kontrollet e brendshme., në përputhje me Ligjit nr. 10296, datë 08.07.2010 “Për menaxhimin financiar dhe Kontrollin”, i ndryshuar neni 20, gërma d dhe Manualin e MFK, Kapitulli III, Mjedisi i kontrollit të brendshëm “Profesionalizmi i stafit”.

Lidhur me këtë është rekomanduar që strukturat përgjegjëse (Sektorët /Drejtoritë dhe kështu me radhë sipas hierarkisë) të marrin masat e duhura për parashikimin e nevojave për zhvillimin e kompetencave profesionale të punonjësve, dhe në bazë të këtyre parashikimeve të hartojnë dhe kryejnë trajnime specifike për punonjës të administratës mbi menaxhimin financiar dhe kontrollin dhe manualin e nxjerrë në zbatim të tij (në veçanti për menaxhimin e riskut pasi u konstatua se, menaxherët e njësisë nuk zotërojnë informacion për qëllimet dhe rëndësinë e tij).

Në të njëjtin dokument Kontrolli i Lartë i Shtetit nënvizon se në në Ministrinë e Drejtësisë u konstatua se nuk janë marrë masa për hartimin e gjurmës së auditimit për institucionin, e cila është një instrument menaxhimi që mundëson nga njëra anë ndjekjen e ecurisë së një procesi nga fillimi në fund dhe në anën tjetër, ndjekjen e ecurisë së këtij procesi përgjatë strukturave të njësisë, apo ndërmjet vetë njësisë dhe institucioneve të jashtme.

KLSH ka rekomanduar që strukturat përgjegjëse të marrin masat e duhura për të siguruar kontrolle efikase në menaxhimin e parasë publike, nëpërmjet procedurave të shkruara, rregullave të specifikuara mbi ndarjen e detyrave. Pagesat të realizohen vetëm në rastet kur shpenzimi i realizuar është i shoqëruar me te gjithë dokumentacionin përkatës./Monitor/