Mëngjes tërmetesh, toka nuk po qetësohet dot

Pas tërmetit të fuqishëm të mbrëmjes së të dielës me magnitudë 4.7 të shkallës Rihter dhe thellësi 9 kilometra me epiqendër Klos të Dibrës, pasuan 10 pasgoditje gjatë natës dhe ai i fundit u regjistrua në orën 8:01 të mëngjesit të sotëm me magnitudë 2.8 të shkallës Rihter me thellësi 15 kilometra dhe epiqendër Suç të Dibrës, raporton Instituti i Gjeoshkencave.

Ndërkohë Instituti i Gjeoshkencave ka bërë të ditur se tërmeti i fuqishëm i orës 22:37 mbrëmjen e së dielës u shoqërua me 34 paragoditje:

“Në datën 15 Janar 2023, ora 22:37:21 (ora lokale), Instituti i Gjeoshkencave ka lokalizuar një tërmet me magnitudë 4.7, i lokalizuar 4 km në Jug-Perëndim të Klosit, Dibër me thellësi 9 km. Kjo goditje kryesore është shoqëruar nga disa pasgoditje me magnitudë lokale të shtrirjes nga ML [1.0 – 3.9]. Goditja kryesore [ML4.7] është shoqëruar nga 34 paragoditje. Frekuenca e ngjarjeve (Numri i ngjarjeve për njësi të kohës) mesatarisht është 1 ngjarje për çdo 4-5 minuta. Trendi i magnitudave të pasgoditjeve është drejt uljes,” thekson Instituti i Gjeoshkencave duke siguruar qytetarët se është në monitorim të vazhdueshëm të situatës dhe do mbaj të përditësuar mbi aktivitetin sizmik në vijim.

Ndryshe, tërmeti i orës 22:37 të mbrëmjes së 15 Janarit shkaktoi panik ndër qytetarët e Klosit, Dibrës, Elbasanit, Tiranës dhe Pogradecit ndërsa u dëgjua në gjithë territorin shqiptar.

Qendra Kombëtare Operacionale e Emergjencave Civile bëri të ditur se janë raportuar dëme të lehta në Njësinë Administrative Xibër, Bashkia Klos, në disa banesa ku ka pasur plasaritje të mureve.