Merkel për çelje sa më të shpejtë të negociatave me Shqipërinë dhe Maqedoninë e Veriut

Kancelarja gjermane, Angela Merkel tha në Zagreb se do të bisedojë me Francën për të krijuar kushtet për fillimin e negociatave me Shqipërinë dhe Maqedoninë e Veriut.

Kancelarja Merkel dëshiron konsensus sa më të shpejtë me Francën për reformimin e zgjerimit të Bashkimit Evropian, raporton DW, dhe pas takimit me homologun e saj kroat, Andrej Plenkoviç, u shpreh:

“I mbështesim planet e qeverisë kroate për të organizuar një konferencë të përbashkët me vendet e Ballkanit Perëndimor në formatin e plotë Bashkimit Evropian. Dhe do të jetë e rëndësishme që ne të krijojmë kushtet  për fillimin e negociatave me Shqipërinë dhe Maqedoninë e Veriut”

Duke pasur parasysh propozimin e ri të qeverisë franceze për reformimin e procesit të zgjerimit, kancelarja gjermane tha: 

“Ne tani duhet të bisedojmë me Francën dhe këtë duhet ta bëjmë shumë intensivisht, për të saktësuar elementet që duhen përmirësuar , që duhen ndryshuar, në procesin e  zgjerimit. Jemi të gatshëm të bisedojmë, edhe pse qysh sot kemi një numër të madh mundësish për të qenë fleksibël,” tha Merkel duke shtuar se reformimi i zgjerimit duhet t’u ofrojë vendeve të Ballkanit Perëndimor një perspektivë reale anëtarësimi, dhe reformimi nuk duhet të ketë si pasojë BE-ja të tërhiqet nga premtimet e bëra.  

Kancelarja gjermane në Zagreb po merr pjesë në Kongresin e Partisë Popullore Europiane, duke përfaqësuar kryetaren e partisë së vet, Annegret Kramp-Karrenbauer, e cila është duke përgatitur kongresin e CDU-së, që do të zhvillohet të premten, më 22 nëntor. në Lajpcig. 

Ndryshe, Kroacia do të jetë kryetare e radhës e BE-së në gjysmën e parë të vitit të ardhshëm, ndërsa Gjermania në gjysmën e dytë. Të dy vendet janë mbështetës të fuqishëm të anëtarësimit të vendeve të Ballkanit Perëndimor në BE.