Merkel refuzon ftesën e Trumpit për Samitin e G7-ës në Washington

Kancelarja gjermane, Angela Merkel ka refuzuar ftesën e presidentit amerikan, Donald Trump për të marrë pjesë në samitin e grupit të shtatë vendeve më të industrializuara G7, në Shtetet e Bashkuara.

“Kancelarja federale falënderon presidentin Trump për ftesën e tij në Samitin e G7-ës në fund të muajit qershor në Washington,” është shprehur zëdhënësi i Qeverisë gjermane, Steffen Seibert, duke shtuar:

“Duke marrë parasysh situatën me pandeminë, ajo nuk është pajtuar për pjesëmarrje personale dhe udhëtim drejt Washingtonit. Ajo natyrisht se do të vazhdojë të vëzhgojë zhvillimet rreth pandemisë.”

Shtëpia e Bardhë ka deklaruar më 26 maj se Presidenti Trump beson se nuk mund të ketë shembull më të mirë të rihapjes së ekonomisë, pas izolimit të shkaktuar nga koronavirusi, se sa mbajtja e Samitit G7, në Shtetet e Bashkuara, në fund të muajit qershor.

Ndryshe, sipas të dhënave të Universitetit Johns Hopkins, raporton RFE, 5.9 milionë persona janë infektuar me koronavirus, prej tyre mbi 360.000 kanë vdekur.