Mesazh magjistratëve të rinj, Kryediplomatja e SHBA në Tiranë: Ju mund të jepni shpresa për këtë vend!

E ngarkuara me punë e Ambasadës së Shteteve të Bashkuara në Tiranë, Leyla Moses-Ones, me rastin e diplomimit të studentëve të shkollës së Magjistraturës kërkoi nga ata të mbajnë sytë hapur për të luftuar krimin dhe korrupsionin në Shqipëri sepse secili mund të japë shpresa për këtë vend.

“Ju mund të jeni pjesë e diçkaje më të madhe se vetja juaj, mund të zgjidhni për t’i dhënë progres reformës në drejtësi për të ecur përpara dhe ju jeni kryesorë për këto përpjekje. Përpjekjet tuaja do të jenë mjaft të rëndësishme për sistemin e ri të drejtësisë në Shqipëri. Do të merrni vendime për një sistem drejtësie, transparent për të luftuar korrupsionin,” tha Kryediplomatja e SHBA në Tiranë duke e bërë të qartë se do të jenë ata që do të flasin për ato që besojnë tek sistemi i drejtësisë.

“Për një sistem ku do të respektohet çdo individ. Ju bëj thirrje për një Shqipëri më demokratike, të përfaqësoni profesionin tuaj të ri në mënyrë të suksesshme. Duhet t’i mbani sytë hapur ndaj pabarazisë dhe korrupsionit, jeni vigjilent ndaj tyre. Secili mund të japë shpresa për këtë vend dhe nëse bëheni bashkë përpjekjet tuaja do të krijojnë diçka mjaft të rëndësishme,” tha E ngarkuara me punë e Ambasadës së Shteteve të Bashkuara në Tiranë, Leyla Moses-Ones, duke e vlerësuar si momentin e tyre për të qenë pjesë e diçkaje të madhe.