Mesazh për Edi Ramën/ Basha nga Kavaja: Zgjedhje pa PD nuk do të ketë as sot, as më 30 qershor, as mot…

Europa më në fund e ka dëgjuar zërin tonë, tha Kryetari I Partisë Demokratike, Lulzim Basha nga Kavaja duke shtuar se mesazhet e Europës kurrë nuk janë dëgjuar më të qarta e më të prera, ka folur Londra, ka folur Berlini, zgjedhje demokratike pa opozitën nuk ka.

“Zgjedhje pa PD nuk do të ketë as sot, as më 30 qershor, as mot, ta harrojë klika kriminale. Aq sa bëri zgjedhje pa PD në Kavajë, aq do të bëjë edhe në Shqipëri më 30 qershor, kuti më kuti, qendër votimi më qendër votimi, shqiptarët e bashkuar kanë për të triumfuar. Dhe ne nuk do të lejojmë në asnjë qendër votimi, në asnjë lagje, në asnjë qytet dhe në asnjë fshat një tjetër proces fals zgjedhor, ku në vend që të diktojë sovrani, në vend që të zgjidhet mes më të mirëve, krimi dhe kriminelët e Edi Ramës t’i detyrojnë shqiptarët të qeverisën nga qeveritarët më të korruptuar që ka njohur Ballkani. Jo!” ishte I prerë Lulzim Basha duke I bëërë të qartë Edi Ramës se kjo ditë ka perënduar një herë e mirë.

“Një ditë e re ka lindur, dhe si ditët më të bukura të këtij kombi, gjeneza është jo rastësisht në Kavajë se ne demokratët, nuk besojmë në rastësi, ne besojmë në bekimin hyjnor në dorën e Zotit që i ngre shpirtrat e njerëzve i mbush me frymëzim, i mbush me shpresë, i mbush me kurajo ditë për ditë kundër vështirësive, ditë për ditë e natë për natë e në veçanti në këtë muaj të bekuar të sakrificës, të shpresës e të ngadhënjimit.”

Mbi këtë bazë lindi shpresa, u zgjua vetëdija e shqiptarëve. Ishte pjesëmarrja, ishte bashkimi, ishte qëndresa, edhe përballë dhunës së paprecedentë policore, para gazit djegës dhe helmues luftarak, para reve të gazit lotsjellës, para arrestimeve arbitrare, para kërcënimeve politike të prokurorisë së kapur. Asgjë nuk i ka mposhtur demokratët, tha lideri i opozitës para qytetarëve të Kavajës, ata që dhanë kontribut të madh pse sot beteja për të mposhtur frikën, ka avancuar, është në gjysmën e saj, tirania e krimit është në muzgun e saj, liria e vërtetë është në agimet e saj. Por beteja duhet çuar deri në fund.

“Ndaj e nesërmja është një ditë shumë e rëndësishme, është dita kur nga njëra anë Shqipëria e frikës, Shqipëria e terrorit, Shqipëria e krimit dhe e korrupsionit, po shpreson ta mpakë, ta lodhë, ta përçajë popullin e bashkuar e të ngritur si asnjëherë më pare dhe, nga ana tjetër, Shqipëria e shpresës, Shqipëria e besimit në Zot, e besimit në vlera, e besimit tek e nesërmja më e mirë, Shqipëria e shqiptarëve europianë, Shqipëria e lirisë dhe Demokracisë, bëhet gati për një përballje vendimtare, pa kthim, pa asnjë hap prapa, për t’ia marrë vendin tonë, fatet tona të grabitura nga Edi Rama dhe klika e tij kriminale nga dora,” konstaton Basha në mënyrë që kavajasit dhe gjithë shqiptarët të bëhen  Zot në shtëpitë e tyre. Zot në Shqipërinë tonë!

“Çdo qeveri e ardhur me votë të lirë, nuk do të jetë peng i kriminelëve, nuk do të jetë peng i oligarkëve, por do të jetë nga momenti i parë deri në momentin e fundit, peng i qytetarëve shqiptarë, peng i votës tuaj, peng i gjykimit tuaj. Ky është parimi numër një i Europës, e cila ka folur qartë dje dhe sot, në gjermanisht, përkthyer edhe në shqip: nuk ka hapje negociatash pa dënuar ata që vodhën zgjdhjet e vitit 2017-të. Sepse nuk ka zgjedhje pa dënuar ata që vodhën zgjedhjet e vitit 2017-të. Sepse te shkatërrimi i votës së lirë, vijnë filizat e të keqes.

Ku nuk ka votë të lirë, ka mjerim, ka papunësi, ka varfëri, ka dëshpërim, ka arrogancë, ka paligjshmëri, ka krim, ka arrogancë dhe përbuzje.Vota e lirë është themeli i të mirës dhë të përparuerës në çdo shoqëri europiane.”

Kemi zgjedhur të ndërtojmë Europën këtu dhe nuk na mungon asgjë. Jemi një vend i pasur, me një popull të mrekullueshëm dhe punëtor, të bekuar me një rini të zgjuar, të përgatitur. Nuk jemi të varfër, jemi të grabitur dhe të vjedhur, nga një klikë kriminale. Ne e dimë se si hapet dera drejt Europës, duke ndërtuar Europën këtu me zgjedhje të lira, me ndarje pushtetesh, me gjyqësor të pavarur, me një qeveri që ju dëgjon dhe ju shërben ju, në vend që t’ju shkelmojë e t’ju dhunojë. Me një qeveri që buron nga vota e juaj dhe ka respektin maksimal për çdo shqiptar, gjithësecilin prej bashkëatdhetarëve tanë, gjithësecilin prej tyre,” tha Basha duke shtuar se këtë e besojnë demokratët, këtë e beson e djathta europiane, ndaj edhe lufta e PD është për dinjitetin e çdo shqiptari dhe kjo e ndan nga banda kriminale, që i trajton shqiptarët si qenie pa dinjitet.

“Prandaj, ne kurrë nuk do të blejmë votën e shqiptarëve, por do ta kërkojmë atë me përulësi, duke ofruar programin tonë, zgjidhjet tona, që do të krijojnë mundësi, punësim dhe mirëqenie për shqiptarët, që do të çlirojë biznesin nga taksat, që do të rikthejnë satndardet europiane në arsim dhe shëndetësi, që nuk do të lënë askënd mbrapa, duke dyfishuar ndihmën ekonomike dhe duke rritur pensionet për çdo shqiptar.”

Në këtë betejë, pala tjetër, ky grusht njerëzish, do të bëjnë gjithçka për të ruajtur favoret e tyre të paligjëshme, tha Kryetari i Partisë Demokratike duke shtuar se investimi i tyre kryesor është të na përçajnë, të na demoralizojnë dhe të na lodhin. Unë ju them: Ah sa gabim e keni! Shikojeni këtë sallë, dëgjojeni Kavajën, dëgjojeni Gjirokastrën, dëgjojeni Shkodrën, shikojeni nesër Tiranën.

“Kjo betejë do të ketë vetëm një përfundim: mposhtjen e Shqipërisë së frikës, fitoren e Shqipërisë së shpresës. Shqipëria e lirë demokratike, me bekimin e Zotit, me punën e njerëzve të ndershëm, ky do të jetë destini final. Shqipëria si gjithë Europa na thërret nesër, në betejën tonë pa kthim.”

Ndaj ju kërkoj, në vigjilje të së nesërmes, në këtë muzg të bukur, para faljes, të bashkohemi nesër në Tiranë, tha Kryetari i Partisë Demokratike, Lulzim Basha, duke ju drejtuar të gjithë besimtarëve myslimanë në Kavajë urimin për një agjërim të pranuar, por dhe me kujtesën se në çdo ditë të Zotit e në veçanti në ditë të shënuara, i madh është shpërblimi për ata që luftojnë për kauzën e drejtë, që luftojnë për lirinë e njëri-tjetrit, ndërsa përfundoi:

“Të gjithë që jeni në këtë sallë, dhe ata që janë jashtë kësaj salle dhe pesëfish me shumë, dhjetëfish më shumë, me këtë frymë, me këtë entuziazëm, me këtë vendosmëri, mirë se vini nesër në Tiranë, në betejen tonë vendimtare, për Shqipërinë si gjithë Europa.”

Fjala e plotë:

Mirë se ju gjej zonja zonja dhe zotërinj, vëllezër dhe motra, demokrate dhe demokratë të Kavajës dhe të Rrogozhinës

Zoti kryetar i degës së PD Kavajë,

Zoti Ferdincand Saraçi, të nderuar të deleguar të PD, Oriola Pampuri, Ndriçim Hoxha

Drejtues organizativ dhe  politikë, kryetarë grupseksionësh, anëtarë të kryesive, anëtarë të këshillit kombëtar të PD, drejtues dhe ish drejtues të njësive vendore,

Zonja drejtuese të Lidhjes Demorkatike të Gruas dhe një përshëndetje gjithmonë të veçantë për forumin rinor të PD të Kavajës dhe të Rrogozhinës!

Faleminderit nga zemra për këtë pritje të jashtëzakonshme, parathënie e ditës të nesërme, të bashkimit më të madh të shqiptarëve në orën 18:30 në Tiranë, të betejës tonë deri në fitore kundër tiranisë së krimit, kundër diktaturës së korrupsionit, Rama ik!

Vëllezër dhe motra,

Europa më në fund e ka dëgjuar zërin tonë, e ka dëgjuar zërin tuaj. E ka dëgjuar britmën e lirisë që ushton nga Kavaja, që ushton nga Shkodra, që ushton nga Gjirokastra dhe Vlora, nga Korça, Kukësi, Tropoja, Dibra dhe Hasi, ushton nga Tirana: E duam Shqipërinë si gjithë Europa dhe do ta bëjmë Shqipërinë si gjithë Europa!

Mesazhet e Europës kurrë nuk janë dëgjuar më të qarta e më të prera, ka folur Londra, ka folur Berlini, zgjedhje demokratike pa opozitën nuk ka. Zgjedhje pa PD nuk do të ketë as sot, as më 30 qershor, as mot, ta harrojë klika kriminale.

Aq sa bëri zgjedhje pa PD në Kavajë, aq do të bëjë edhe në Shqipëri më 30 qershor, kuti më kuti, qendër votimi më qendër votimi, shqiptarët e bashkuar kanë për të triumfuar.

Dhe ne nuk do të lejojmë në asnjë qendër votimi, në asnjë lagje, në asnjë qytet dhe në asnjë fshat një tjetër proces fals zgjedhor, ku në vend që të diktojë sovrani, në vend që të zgjidhet mes më të mirëve, krimi dhe kriminelët e Edi Ramës t’i detyrojnë shqiptarët përsëri të qeverisen nga përdhunuesit dhe trafikantët e grave shqiptare e vajzave tona, t’i detyrojë të qeverisen nga trafikantët e drogës, t’i detyrojë të qeverisën nga qeveritarët më të korruptuar që ka njohur Ballkani, jo! Kjo ditë ka perënduar një herë e mirë për Kavajën dhe për mbarë Shqipërinë!

Një ditë e re ka lindur, dhe si ditët më të bukura të këtij kombi, gjeneza është jo rastësisht në Kavajë se ne demokratët, nuk besojmë në rastësi, ne besojmë në bekimin hyjnor në dorën e Zotit që i ngre shpirtrat e njerëzve i mbush me frymëzim, i mbush me shpresë, i mbush me kurajo ditë për ditë kundër vështirësive, ditë për ditë e natë për natë e në veçanti në këtë muaj të bekuar të sakrificës, të shpresës e të ngadhënjimit.

Nuk ka rastësi, këtu janë gjenezat e ditëve të bardha për shqiptarët, këtu është gjeneza e kryengritjes antikomuniste që nisi rrëzimin e diktaturës së Enver Hoxhës. Këtu ishte qëndresa në ditët e vështira, dy vite më parë ku krimi diktoi kudo, por jo në Kavajë sepse kavajasit u bashkuan qëndruan dhe i treguan vendin.

Por vëllezër e motra këtu ka gjenezën edhe diçka tjetër, diçka që nuk ka mbaruar ende, por që filloi në Kavajë. Nuk e harroj takimin e parë në turin tonë për protestën e parë për 16 shkurtin, që nisi kryengritjen demokratike të shqiptarëve për ta ndarër Shqipërinë nga qeverisja me krimin, dita e parë e organizimit nisi nga Kavaja, me rininë e Kavajës, me demokratët e Kavajës, me qytetarët e Kavajës,

Zoti ju bekoftë ju!

Zoti e bekoftë Kavajën!

E bekuar ishte ajo ditë, i bekuar ishte ai fillim, vetëm 12 javë më parë Shqipëria vazhdonte lëngimin 6 vjeçar nën thundrën e një njeriu të korruptuar deri në palcë, hajdut që nuk e ka parë Shqipëria më sy, dhe e gjora Shqipëri ka parë shumë hajdutë, për fat të keq, por asnjë si Edi Ramën dhe shpurën e tij kriminale.

6 vjet dhunim i të drejtave tuaja, 6 vjet burgosje të kryefamiljarëve që nuk paguanin dot faturat e kripura të energjisë. Këtu në burgun e Rrogozhinës sa kryefamiljarë vdiqën apo u flijuan sepse u burgosën për 30 mijë lekë të vjetra, ndërkohë që kriminelët dhe oligarkët të bërë njësh me pushtetin e paligjshëm të Edi Ramës edhe kur u kapën duke dhjetëra milionë euro, vazhduan të festonin, të hanin e të pinin, të pasuroheshin si derra, mbi gjakun dhe djersën, mbi flijimin e dhjetëra dhe qindra jetëve të pafajshme të kryefamiljarëve, të të rinjve e të rejave.

12 javë më parë, përmasat e depresionit social, ekonomik dhe psikik të shqiptarëve morën konturet e papara dhe të padëgjuara të emigracionit, që nga fillimi i viteve ’90.Deri 12 javë më parë, shpresa ishte në gjendje klinike, besimi tek e nesërmja kishte vdekur. Por jo në Kavajë, jo këtu, ku demokratët e bashkuar i dhanë dorën njëri-tjetrit, i dhanë një sinjal armatës tonë të lirisë, që u çua fuqishëm me 16 shkurt, për të realizuar atë që deri me 16 shkurt ishte bashkimi më i madh i shqiptarëve, për të shtruar rrugën drejt një akti sublim, nxjerrjes lakuriq të parlamentit të krimit në sytë e shqiptarëve, dhe për të nisur kështu një rrugëtim të mahnitshëm, për nga kurajo politike, që ka një dhe vetëm një shpjegim, pjesëmarrjen tuaj, bashkimin tuaj, qëndresën tuaj, përballjen tuaj, shpirtin tuaj o demokratë të Kavajës dhe të gjithë Shqipërisë.

Mbi këtë bazë lindi shpresa, u zgjua vetëdija e shqiptarëve.Ishte pjesëmarrja, ishte bashkimi, ishte qëndresa, edhe përballë dhunës së paprecedentë policore, para gazit djegës dhe helmues luftarak, para reve të gazit lotsjellës, para arrestimeve arbitrare, para kërcënimeve politike të prokurorisë së kapur.

Asgjë nuk i ka mposhtur demokratët.

Ne jemi sot balli i udhëheqjes së kësaj lëvizjeje kombëtare, jemi arsyeja pse shpresa nuk ka vdekur, por është zgjuar në zemrën e çdo shqiptari, gegë e toskë, myslimanë e të krishterë, të djathtë e të majtë, të vendosur në këtë betejë.Sepse fitorja e kësaj beteje është për Shqipërinë fitore për jetë a vdekje.

Nuk është kjo betejë për pushtetin politik të Lulzim Bashës, nuk bëhet kjo betejë thjesht dhe vetëm për rotacionin politik.

Gjithë Shqipëria e di, e gjithë Evropa e di, ne jemi sot, së bashku me aleatët tanë, mazhoranca e re politike, morale dhe numerike e Shqipërisë. Por në këtë betejë nuk jemi thjesht dhe vetëm për rotacion politik, ne jemi në këtë betejë për një transformim të thellë që do t’i japë fund tranzicionit të tejzgjatur që do diktojë standardin evropian në demokraci, përmes një reforme të thellë politike dhe kushtetuese, standardin e ri në shtetin e së drejtës, që do t’i trajtojë njësoj qytetarët para ligjit, jo ca si të nënës e ca si të njerkës, duke goditur, burgosur, dhunuar të pafajshmit, të dobëtin, të pambrojturin dhe duke i shpëtuar drejtësisë ata që të parët duhet të jenë prapa hekurave për një mijë e një të zeza që u kanë bërë qytetarëve shqiptarë. Ne nuk jemi në këtë betejë thjesht për 4 apo 8 vitet e ardhshme. Jo, jo. Ne jemi në betejë për 10, 15 vitet e ardhshme, që fëmijët e Kavajës dhe të të gjithë Shqipërisë kurrë më të mos përjetojnë dhunën, arbitraritetin, padrejtësinë, varfërinë, mjerimin. Kurrë më në këtë vend asnjë qytetar të mos ketë frikë askënd përveç Zotit dhe qeveria të ketë frikë popullin e vet, të ketë frikë qytetarët.

Ky është standardi evropian i thënë kaq bukur, ky është standardi perëndimor në fjalët e njërit prej etërve themelues të shembullit tonë të frymëzimit, demokracisë amerikane, në fjalët e Tomas Xheferson, “liria është kur qeveria ka frikë popullin, tirania është kur populli ka frikë qeverinë”.

E pra miqtë e mi, beteja për të mposhtur frikën, ka avancuar, është në gjysmën e saj, tirania e krimit është në muzgun e saj, liria e vërtetë është në agimet e saj.

Por beteja duhet çuar deri në fund.

Ndaj e nesërmja është një ditë shumë e rëndësishme, është dita kur nga njëra anë Shqipëria e frikës, Shqipëria e terrorit, Shqipëria e krimit dhe e korrupsionit, po shpreson ta mpakë, ta lodhë, ta përçajë popullin e bashkuar e të ngritur si asnjëherë më pare dhe, nga ana tjetër, Shqipëria e shpresës, Shqipëria e besimit në Zot, e besimit në vlera, e besimit tek e nesërmja më e mirë, Shqipëria e shqiptarëve europianë, Shqipëria e lirisë dhe Demokracisë, bëhet gati për një përballje vendimtare, pa kthim, pa asnjë hap prapa, për t’ia marrë vendin tonë, fatet tona të grabitura nga Edi Rama dhe klika e tij kriminale nga dora dhe për t’i bërë kavajasit dhe gjithë shqiptarët Zot në shtëpitë e tyre. Zot në Shqipërinë tonë!

Zgjedhjet e lira dhe të ndershme, janë themeli i bashkëjetesës demokratike. Votë e lirë e diktuar vetëm nga vullneti i lirë dhe jo nga krimi, ky është themeli i qeverisjes së re që do të ndërtojmë. Në këtë mënyrë, çdo qeveri e ardhur me votë të lirë, nuk do të jetë peng i kriminelëve, nuk do të jetë peng i oligarkëve, por do të jetë nga momenti i parë deri në momentin e fundit, peng i qytetarëve shqiptarë, peng i votës tuaj, peng i gjykimit tuaj.

Ky është parimi numër një i Europës, e cila ka folur qartë dje dhe sot, në gjermanisht, përkthyer edhe në shqip: nuk ka hapje negociatash pa dënuar ata që vodhën zgjdhjet e vitit 2017-të. Sepse nuk ka zgjedhje pa dënuar ata që vodhën zgjedhjet e vitit 2017-të. Sepse te shkatërrimi i votës së lirë, vijnë filizat e të keqes.

Ku nuk ka votë të lirë, ka mjerim, ka papunësi, ka varfëri, ka dëshpërim, ka arrogancë, ka paligjshmëri, ka krim, ka arrogancë dhe përbuzje.Vota e lirë është themeli i të mirës dhë të përparuerës në çdo shoqëri europiane.

Kavaja, prej ditës së parë, ka synuar dhe ka kërkuar Europën.Sa bijë dhe bija u larguan vitet e para për ta gjetur Europën në itali dhe vende të tjera të Europës, për të gjetur standartin perëndimor, deri në SHBA apo Australi? Një rrugë plot dhumbje, plot me sakrifica. Nuk mund ta lejojmë, 30 vite pas atyre sakrificave, nuk mund të lejojmë kurrsesi më, që e vetmja rrugë drejt Europës është të largohemi nga shtëpitë tona.

Kemi zgjedhur të ndërtojmë Europën këtu dhe nuk na mungon asgjë. Jemi një vend i pasur, me një popull të mrekullueshëm dhe punëtor, të bekuar me një rini të zgjuar, të përgatitur. Nuk jemi të varfër, jemi të grabitur dhe të vjedhur, nga një klikë kriminale.

Ne e dimë se si hapet dera drejt Europës, duke ndërtuar Europën këtu me zgjedhje të lira, me ndarje pushtetesh, me gjyqësor të pavarur, me një qeveri që ju dëgjon dhe ju shërben ju, në vend që t’ju shkelmojë e t’ju dhunojë. Me një qeveri që buron nga vota e juaj dhe ka respektin maksimal për çdo shqiptar, gjithësecilin prej bashkëatdhetarëve tanë, gjithësecilin prej tyre.Sepse çdo shqiptar, çdo qenie njerëzore, çdo qytetar, është unik, i krijuar, siç thonë librat e shenjtë, në shëmbëlltyrën e Zotit.Këtë besojmë ne demokratët, këtë beson e djathta europiane, ndaj edhe lufta jonë, është për dinjitetin e çdo shqiptari.Të gjithë për ne janë njësoj të barabartë dhe të rëndësishëm. Kjo na ndan nga banda kriminale, që i trajton shqiptarët si qenie pa dinjitet.

Prandaj, ne kurrë nuk do të blejmë votën e shqiptarëve, por do ta kërkojmë atë me përulësi, duke ofruar programin tonë, zgjidhjet tona, që do të krijojnë mundësi, punësim dhe mirëqenie për shqiptarët, që do të çlirojë biznesin nga taksat, që do të rikthejnë satndardet europiane në arsim dhe shëndetësi, që nuk do të lënë askënd mbrapa, duke dyfishuar ndihmën ekonomike dhe duke rritur pensionet për çdo shqiptar.

Të gjitha këto janë të mundura, kur ta rrëzojmë Shqipërinë e frikës, që është Shqipëria e pakicës, dhe të ndërtojmë bashkë, Shqipërinë e shpresës, Shqipërinë e besimit, Shqipërinë europiane, Shqipërinë e lirë, Shqipërinë e demokracisë, Shqipërinë si gjithë Europa.

Në këtë betejë, pala tjetër, ky grusht njerëzish, do të bëjnë gjithçka për të ruajtur favoret e tyre të paligjëshme. Investimi i tyre kryesor është të na përçajnë, të na demoralizojnë dhe të na lodhin. Unë ju them: Ah sa gabim e keni! Shikojeni këtë sallë, dëgjojeni Kavajën, dëgjojeni Gjirokastrën, dëgjojeni Shkodrën, shikojeni nesër Tiranën.

Kjo betejë do të ketë vetëm një përfundim: mposhtjen e Shqipërisë së frikës, fitoren e Shqipërisë së shpresës. Shqipëria e lirë demokratike, me bekimin e Zotit, me punën e njerëzve të ndershëm, ky do të jetë destini final.

Shqipëria si gjithë Europa na thërret nesër, në betejën tonë pa kthim.

Ndaj ju kërkoj, në vigjilje të së nesërmes, në këtë muzg të bukur, para faljes, të bashkohemi nesër në Tiranë! Dhe ju drejtoj të gjithë besimtarëve myslimanë këtu në Kavajë urimin tim për një agjërim të pranuar, por dhe me kujtesën se në çdo ditë të Zotit e në veçanti në ditë të shënuara, i madh është shpërblimi për ata që luftojnë për kauzën e drejtë, që luftojnë për lirinë e njëri-tjetrit,

Të gjithë që jeni në këtë sallë, dhe ata që janë jashtë kësaj salle dhe pesëfish me shumë, dhjetëfish më shumë, me këtë frymë, me këtë entuziazëm, me këtë vendosmëri, mirë se vini nesër në Tiranë, në betejen tonë vendimtare, për Shqipërinë si gjithë Europa.

Zoti e bekoftë Kavajën e lirisë, Kavajën e demokracisë!

Zoti e bekoftë Shqipërinë!

Fitore!