Mesazh për pilotët dhe trafikantët e drogës, Trump: Po e mbyll hapësirën ajrore mbi Venezuelë
Në një mesazh drejtuar kompanive ajrore, pilotëve, por dhe kontrabandistëve të drogës dhe trafikantëve të qenieve njerëzore, Presidenti i SHBA-së, Donald J. Trump, ju bënë të ditur se ka mbyllur hapësirën ajrore mbi dhe përreth Venezuelës.
“Të gjitha linjave ajrore, pilotëve, kontrabandistëve të drogës dhe trafikantëve të qenieve njerëzore, ju lutemi të merrni parasysh se HAPËSIRA AJRORE MBI DHE PËRRETH VENEZUELËS DO TË JETË E MBYLLUR PLOTËSISHT! Falemnderit për vëmendjen tuaj lidhur me këtë çështje!” thekson Donald Trump përmes rrjetit social Truth.
Përshkallëzimi i presionit mbi Venezuelën
Gjatë javës, Presidenti Trump shpalli Presidentin e Venezuelës, Nicolás Maduro, dhe aleatët e tij në qeveri si anëtarë të një organizate terroriste të huaj.
Përcaktimi i të ashtuquajturit “Cartel de los Soles” – një frazë që ekspertët thonë se përshkruan më shumë zyrtarë qeveritarë të dyshuar si të korruptuar sesa një grup të krimit të organizuar – si një organizatë terroriste e huaj i jep Trump autoritetin për të vendosur sanksione të reja që synojnë asetet dhe infrastrukturën e Maduros. Megjithatë, sipas ekspertëve ligjorë, ky vendim nuk autorizon shprehimisht përdorimin e forcës vdekjeprurëse.
Trump tha të enjten se Shtetet e Bashkuara po përgatiten për një goditje të re ndaj rrjeteve të dyshuara të trafikimit të drogës në Venezuelë. Gjatë një telefonate për Ditën e Falënderimeve me anëtarë të forcave të armatosura, ai tha se operacionet tokësore do të fillojnë “shumë shpejt”.
“Ju keni punuar gjatë disa javëve të fundit për të penguar trafikantët e drogës venezueliane, të cilët janë të shumtë. Sigurisht, jo shumë po vijnë më nga deti”, u tha Trump trupave.
“Ndoshta keni vënë re se njerëzit nuk duan të transportojnë më mallra nga deti dhe ne do të fillojmë t’i ndalojmë ata nga toka. Toka është më e lehtë, por do të fillojë shumë shpejt,” vazhdoi presidenti duke paralajmëruar:
“Ne po i paralajmërojmë ata: Ndaloni së dërguari helm në vendin tonë!”
Anija luftarake më e madhe në histori u dërgua në Karaibe
Si pjesë e një operacioni që Pentagoni e ka quajtur “Operacioni Shtiza Jugore”, ushtria amerikane ka vendosur më shumë se dhjetë anije luftarake dhe 15.000 trupa në rajon. Midis anijeve të dërguara në Karaibe është USS Gerald Ford, aeroplanmbajtësja më e madhe e ndërtuar ndonjëherë. Në një fushatë kundër trafikut të drogës, forcat amerikane kanë vrarë më shumë se 80 persona në sulme ndaj anijeve.
CNN raportoi më parë këtë muaj se zyrtarët e administratës Trump u thanë ligjvënësve në një takim me dyer të mbyllura se SHBA-të nuk kanë plane për të nisur sulme brenda Venezuelës dhe se aktualisht nuk ka asnjë justifikim ligjor për sulme ndaj objektivave tokësorë.
Sulmet në Venezuelë
Gjatë takimit, ligjvënësve iu tha se mendimi i Zyrës së Këshilltarit Ligjor për Departamentin e Drejtësisë, i cili justifikon sulmet ndaj anijeve të dyshimta, nuk lejon sulme brenda territorit të vetë Venezuelës ose të ndonjë vendi tjetër, konfirmuan katër burime.
Megjithatë, një nga burimet vuri në dukje se zyrtarët nuk kanë përjashtuar veprime të mundshme në të ardhmen. Administrata është përpjekur kryesisht të shmangë përfshirjen e Kongresit në fushatën e saj ushtarake në të gjithë Amerikën Latine.
Një zyrtar i lartë i Departamentit të Drejtësisë i tha Kongresit në nëntor se ushtria amerikane mund të vazhdonte bastisjet vdekjeprurëse ndaj trafikantëve të dyshuar të drogës pa miratimin e Kongresit, duke argumentuar se administrata nuk ishte e detyruar nga një ligj dekadash i vjetër për fuqitë e luftës që do të kërkonte bashkëpunim me ligjvënësit.
