Mesazh për Putinin, Shefi i NATO-s: Jemi gati!

Sekretari i Përgjithshëm i NATO-s, Mark Rutte, i ka dërguar një mesazh të qartë Presidentit të Rusisë, Vladimir Putinit, pasi dronët rusë hynë në hapësirën ajrore polake.

“Ndalojeni luftën në Ukrainë. Ndalojeni përshkallëzimin e luftës. Ndalojeni shkeljen e hapësirës ajrore të aleatëve dhe dijeni se jemi gati”, tha Mark Rutte duke e konsideruar këtë incident si një vijimësi e luftës së Rusisë në Ukrainë dhe paralajmëroi Moskën se aleatët ishin të vendosur të mbronin çdo centimetër të territorit.

Në pyetjen e gazetarëve nëse besonte se futja e dronëve ishte e qëllimshme, ai tha se vlerësimi ishte ende duke u bërë.

Në fund, Sekretari i Përgjithshëm i NATO-s, Mark Rutte, vlerësoi reagimin e Aleancës dhe falënderoi të gjitha forcat që morën pjesë, duke vënë në dukje se Polonia, Holanda, Italia dhe Gjermania morën pjesë në operacion.

Ndryshe, pas deklaratës së kryeministrit polak Donald Tusk se ishin gjithsej 19 dronë që shkelën hapësirën ajrore të Polonisë, autoritetet polake thanë se janë gjetur 7 dronë ruse dhe pjesë të predhave të paidentifikuara.

Polonia: Do të aktivizojmë Nenin 4 të NATO-s
Kryeministri polak Donald Tusk paralajmëroi se Polonia do të aktivizojë Nenin 4 të Traktatit të themelimit të NATO-s, përkatësisht do të kërkojë konsultime zyrtare brenda Aleancës. Për këtë lëvizje, tha ai, ka ra dakord me Presidentin Karol Nawrocki.

Donald Tusk tha se vlerësonte të gjitha shprehjet e solidaritetit, por fjalët nuk janë të mjaftueshme dhe Polonia do të kërkoj mbështetje shumë më të madhe nga aleatët e NATO-s.

Sipas të dhënave të NATO-s, Neni 4 është aktivizuar vetëm shtatë herë që nga themelimi i NATO-s në vitin 1949. Herën e fundit që u aktivizua ishte në vitin 2022. Në atë kohë, katër shtete anëtare të NATO-s, Polonia, Estonia, Letonia dhe Lituania, bënë thirrje për konsultime për shkak të pushtimit të Ukrainës nga Rusia.