Mesazhi i Paqes, Papa: Paratë të shpenzohen për arsim, jo për armë

Paraja që shpenzohet për armë duhet të destinohet për arsim, tha Papa Françesku në mesazhin vjetor të paqes, duke kritikuar shpenzimet gjithnjë e më të mëdha për mbrojtjen në kurriz të shërbimeve sociale.

Në mesazhin i cili u publikua sot me rastin e Ditës Botërore të Paqes e cila shënohet më 1 Janar, Papa ka bërë thirrje edhe për ekuilibër në mes të ekonomisë së tregut të lirë dhe nevojës për të ndihmuar nevojtarët dhe të ruhet ambienti.

Mesazhi për arsimin

Ati i Shenjtë i kushtoi gati një të tretën e mesazhit për arsimin, duke theksuar se shpenzimet për arsimin në botë janë ulur dukshëm ndërsa shpenzimet për mbrojtje janë rritur edhe mbi nivelet e periudhës së fundit të luftës së ftohtë, dhe duket se është e sigurt se do të vazhdojnë të rriten.

“Koha është që qeveritë të zhvillojnë politikat ekonomike ku mjeteve publike të shpenzuara për arsim dhe armatim t’u ndërrohet vendi,” tha Papa në mesazhin e tij, i cili do ti dërgohet shefave të shteteve dhe organizatave ndërkombëtare.

“Procesi real i çarmatimit ndërkombëtar mund të jetë vetëm i dobishëm për zhvillimin e popujve dhe kombeve, duke lehtësuar mjete financiare që është më mirë të shpenzohen për kujdesin shëndetësor, shkolla, infrastrukturë, kujdesin për tokën etj.” tha Papa Françesku.

Thirrje për çarmatim

Papa bëri thirrje për çarmatim dhe ndalimin e armatimit bërthamor duke shtuar se paratë e destinuara për mbrojtje duhet përdoren për shpërndarje të ndershme të vaksinave kundër COVID-19 dhe hulumtimeve në mënyrë që të parandalohen pandemi të reja në të ardhmen, ndërsa përfundoi:

“Përkundër shumë përpjekjeve me qëllim të dialogut konstruktiv në mes të kombeve, zhurma shurdhuese e luftërave dhe konflikteve është më e fortë. Deri sa sëmundjet po përhapen me përmasa të pandemive, pasojat e ndryshimeve klimatike dhe shkatërrimit të ambientit po përshkallëzohen, e tragjedia e urisë dhe etjes është më e madhe.”