Mesazhi në SPAK, Berisha: Avokatit të McGonigal, të krimeve kushtetuese, skllavit të pasurive të paligjshme

“Altin Troplinit, avokatit të McGonigal, të krimeve kushtetuese dhe armikut të betuar të pluralizmit, skllavit të pasurive të tij të paligjshme, apartamenteve dhe të tjerë,” ishte ky mesazhi që sot e la në SPAK, Kryetari i Partisë Demokratike, Sali Berisha, pasi zbatoi detyrimin ligjor “detyrim paraqitje”.

Irena me 5 mbiemra, tha Kryetari i Partisë Demokratike para Prokurorisë së Posaçme, nuk duhej të ishte më gjyqtare sipas tre ligjeve me tre të pestat! Por ajo mbrohet nga Altin Troplini dhe jo vetëm ai!

“Të dashur qytetarë dhe qytetare, sot unë kam këtë deklaratë para jush, me të cilën faktohet se narkoshteti është shteti i Irenës me 5 mbiemra, i Troplinit dhe Troplinëve të tjerë.
Ndaj dhe ju lutem, sipas dëshirës, të ndiqni këtë deklaratë sot.
Pra, ky është shteti i Irenës me 5 mbiemra që vazhdon detyrën në shkelje flagrante të Kushtetutës dhe ligjeve të vendit.
Për sa më sipër deklaroj se:
Ne kemi bërë kërkesë pranë KLGJ-së për konstatimin e mbarimit të mandatit të Irena Gjokës pasi kur ka marrë mandatin nuk ka pasur kriteret e përcaktuara në ligj për të qenë gjykatëse pasi kishte një vendim penal që kishte marrë formë të prerë.
Konkretisht, Kushtetuta në nenin 6/1, parashikon se një person, integriteti publik i të cilit është cenuar, nuk mund të vijojë funksionet në organet kushtetuese.
Ndalohet, thotë neni, zgjedhja, emërimi apo ushtrimi i një funksioni publik në një nga organet e parashikuara në këtë Kushtetutë, ose të krijuara me ligj, pavarësisht përcaktimeve të bëra në dispozita të tjera.
Nëse verifikohen rrethana që cenojnë integritetin publik të funksionarit publik, sipas kushteve të miratuara me ligj, të miratuara me tre të pestat e të gjithë anëtarëve të Kuvendit.
Ky pra është përcaktimi i Kushtetutës, ligji i miratuar me tre të pestat në vitin 2016, ligji 96 i vitit 2016, parashikon në nenin 28/D për statusin e gjyqtarëve dhe prokurorëve parashikon se nuk mund të ketë statusin e magjistratit një shtetase që është dënuar me vendim penal të formës së prerë, në rastin konkret pra, Irena Gjoka.
Po ky ligj parashikon në nenin 66/3, detyrimin e çdo magjistrati për të njoftuar KLGJ-në menjëherë për ekzistencën e një kushti që çon në mandatin e mandatit.
Po ky ligj parashikon se gjyqtarët e Gjykatës së Krimeve të Rënda, ku ishte gjykatëse Irena Gjoka, do vazhodnin të qëndronin në pozicionin e tyre me përjashtim të rastit kur kishte shkaqe përmbarimin e statusit të magjistratit.
A e kuptoni pra miqtë e mi se kjo delinkuente që fshihet nga Altin Troplini, nga prokurori i përgjithshëm, nga kryeinspektori i përgjithshëm që thotë se nuk na kanë njoftuar, por duket se punonjësit e tij ia kanë fshehur dokumentet, pra kjo qëndron në detyrë duke shkelmuar Kushtetutën e vendit, duke shkelmuar ligjet me tre të pestat, që i diktojnë asaj largimin e menjëhershëm.
Sipas ligjit të dekriminalizimit, të miratuar me tre të pestat, fshehja, refuzimi për të deklaruar dënimet qoftë edhe jo të formës së prerë- Irena me 5 mbiemra e ka të formës së prerë- shkakton ndërprerjen e menjëhershme të funksionit të gjyqtarit dhe Irena Gjoka nuk ka deklaruar një gjykim, një dënim dhe dy dëbime, por mbrohet në mënyrë antikushtetuese, antiligjore nga një bashkëpunëtor krimi që quhet Altin Troplini.
Dhe jo vetëm ai, mbrohet nga KLGJ-ja, mbrohet nga prokurori i përgjithshëm, paçka se gjithçka e akuzon këtë kriminele për fshehje të veprave të saj penale.
Sipas ligjit 95 të vitit 2016, ligj për strukturat e posaçme, gjykatë, prokurori, BKH, të gjithë ata që duhet të punonin në këto struktura, duhet të deklaronin nëse kishin dënime brenda ose jashtë vendit të formës së prerë ose jo për çfarëdo lloj shkelje ligjore.
Dhe Irena me 5 mbiemra përsëri nuk ka deklaruar dënimin e saj në Greqi.
Refuzimi për të deklaruar përbën shkak për shkarkimin e saj të menjëhershëm.
Pra, sipas tre ligjeve të miratuara me tre të pestat, Irena Gjoka nuk duhej të ishte magjistrate të paktën që në hyrje në fuqi të ligjit për dekriminalizimin.
Faktet u bënë publike si fillim nga gazetat greke dhe më pas nga dokumente zyrtare me vulë apostile të sjella dhe dorëzuara në organet kompetente shqiptare që në shkurt të vitit 2024.
Por kur faktet u bënë publike, kur dokumentet u dorëzuan në institucionet zyrtare shqiptare, këto të fundit kishin detyrimin të vendosnin vetë për konstatimin e mbarimit të mandatit për Irena Gjokën që në momentin kur ligji ia ndalon asaj të ishte gjykatëse dhe ndjekjen e saj penale.
Por ajo mbrohet nga Altin Troplini kundrejt një ryshfeti të majmë apo një urdhri antiligjor.
Sidoqoftë Altin Troplini bëhet bashkautor në një krim të shëmtuar ku është shkelur Kushtetuta dhe ligjet e vendit,” tha Sali Berisha duke konstatuar se çdo vendim i Irena Gjokës, që nga dita që ka mashtruar në formularët e dekriminalizimit, është i pavlefshëm.

“Por sigurisht që drejtësia e Soros-reformës, marionetat e Ramës, Troplini e kompani nuk mund të lëshojnë një mashë qorre si Irena Gjoka që u përdor në të gjitha proceset e montuara ndaj opozitës pa asnjë fakt penal, të ndërmarra direkt ngha armiku i egër i pluralizmit, shërbëtori mjeran i Edi Ramës, Altin Troplini.
Dy. KLGJ nuk iu përgjigj kërkesës tonë për të konstatuar përfundimin e mandatit të Irena Gjokës, por ia drejtoi Prokurorisë së Përgjithshme për të nisur hetimet nëse ekzistonte vendimin penal kundër Irena Gjokës dhe nëse ajo e kishte deklaruar atë në formularin e dekriminalizimit, pavarësisht se për këtë kishin vendimin penal të drejtësisë greke të sjellë me vulë apostile.
Prokuroria e Përgjithshme, për të dëshmuar veten se është një institucion tërësisht i kontrolluar, është një institucion që shkelmon Kushtetutë dhe ligje, nuk ka ndërmarrë asnjë masë deri sot.
Tre. Qëllimi i këtij devijimi është i qartë.
Së pari, në mënyrë të paligjshme vonon vendimmarrjen për konstatimin e mbarimit të mandatit meqenëse Irena Gjoka nuk mund të ishte gjykatëse kur ligji ia pengonte një personi të dënuar penalisht të mbante një funksion të tillë.
Së dyti, KLGJ, Uluzi Faqja e Zezë, Altin Troplini dhe marioneta të tjera të pushtetit, zvarritën me qëllim hetimin edhe mbi çështjen e shkeljes së ligjit të dekriminalizimit nga Irena Gjoka, e cila ka fshehur dhe nuk ka deklaruar në formular as dënimin penal dhe as dy ekspulset nga Greqia me qëllim të qartë kalimin e afateve të ndjekjes penale, pra parashkrimin e veprës penale.
Pra kjo është arsyeja që këta shërbëtorë të Edi Ramës apo të korruptuar të Irena Gjokës, nuk ndërmarrin veprime vetëm e vetëm që delinkuentja Irena Gjoka, që mban detyrën në kundërshtim me Kushtetutën, në kundërshtim me ligjet e vendit, të mos japë llogari para drejtësië për këto fshehje dhe shkelje të rënda.
Katër. Për sa i përket pikës së parë, pra mbarimit të mandatit sepse Irena Gjoka nuk ka pasur kriteret për të qenë gjykatëse, kjo e bën çdo procedurë gjyqësore të drejtuar prej saj, pas zgjedhjes gjykatëse në kundërshtim me ligj, procedurë të kryer nga një gjykatë jo e caktuar me ligj.
Pra, çdo vendim i Irena Gjokës, që nga dita që ka mashtruar në formularët e dekriminalizimit, është i pavlefshëm, është nul sepse është marrë nga një person që nuk mund të ishte gjykatës.
Kjo, sipas Kushtetutës, por edhe sipas Gjykatës Europiane të të Drejtave të Njeriut.
Sipas precedentit të Gjykatës Europiane të të Drejtave të Njeriut, Cani kundër Shqipërisë, Irena Gjoka nuk mund të jetë gjykatëse dhe proceset e ndjekura prej saj janë nul.
Rikujtoj këtu se ajo mbahet në detyrë sepse ajo mban dosjen e Ilir Metës, dosje që nuk ka asnjë fakt penal, përveç vendimit hakmarrës primitiv të Edi Ramës ndaj tij,” tha lideri i opozitës i bindur edhe sot se Irena Gjoka duhej të ishte në burg për mosdeklarimin në formularin e dekriminalizimit! Për rastin e saj nuk vlen parashkrimi.

“Pesë. Për sa i përket mosdeklarimit të vendimit penal dhe dy ekspulseve në formularin e dekriminalizimit, kjo është çështje më vete e cila sjell dy pasoja.
E para është ndjekja penale kundrejt Irena Gjokës. Mosdeklarimi në formularin e dekriminalizimit është një vepër penale për të cilën ajo duhet të ishte në burg.
Këta duan të thonë se vepra është parashkruar dhe Irena e tyre me 5 mbiemra, e cila u ka ngrohur xhepat mirë e mirë, nuk mund të ndiqet penalisht.
Kjo në fak është e pavërtetë sepse Irena ka marrë detyra të reja pas krijimit të Gjykatës Speciale, si psh ajo e kryetares së gjykatës, për të cilat kërkohet të plotësojë përsëri formularin e dekriminalizimit.
Ajo ka kaluar procesin e vetingut pas caktimit si kryetare gjykate. Edhe aty me siguri i është kërkuar të bëjë deklarime për fakte të tilla dhe ajo nuk i ka bërë.
Kështu që të gjitha paratë që i kanë marrë Irenës, apo urdhrat e Edi Ramës që kanë zbatuar hidhen në kosh të plehrave dhe dëshmojnë Altin Troplinin, Uluzi Faqeziun dhe KLGJ-në thjesht si skllevër të ryshfeteve apo urdhrave politikë.
Për më tepër, Irena ka ekspozuar veprimet e saj aktive për të mbuluar ekzistencën e vendimit penal në Greqi, të ekspulseve dhe mosdeklarimin e tyre në formularin e dekriminalizimit.
Ju kujtohej se pak kohë më parë ajo i deklaroi BIRN, se nuk kishte vendim penal dhe as ekspuls, ndërkohë që kishte lëshuar prokurorë me firmën e saj dhe kishte angazhuar avokat për të kundërshtuar këto procedura, gjë që është evidente edhe nga drejtësia greke.
Pra, jo vetëm ka bërë veprime aktive për mbulimin e veprës penale, pra e ka vazhduar atë. Pra, jemi para krimit vazhdues në terminologjinë juridike sepse ajo çdo ditë fsheh dënimet, dëbimet dhe veprat penale të saj.
E dyta, mosdeklarimi e vendimit penal në formularin e dekriminalizimit sjell përsëri përfundim të mandatit që në momentin kur është kryer shkelja. Kjo është një procedurë administrative, pra jo penale, për të cilat nuk vlen asnjë afat parashkrimi i kodit penal. Nuk ka nevojë për veprim verifikues kaq kompleks. Mjafton mosplotësimi i një rubrike të formularit për ta larguar nga pozicion i gjyqtarit,” tha Kryetari i Partisë Demokratike duke përfunduar me faktin e gjashtë:
“Pra, pavarësisht përpjekjeve të turpshme të KLGJ-së, Altin Troplinit, Prokurorisë së Përgjithshme për të mbajtur në detyrë një njeri që nuk mund të jetë gjykatëse sipas Kushtetutës, sipas ligjit.
Një njeri që sipas tre ligjeve të miratuara nga kjo mazhorancë duhet të jetë në burg, ajo është e pambrojtshme dhe tashmë e vërteta ka dalë në dritën e diellit.”