Sot festohet Krishtlindja

Besimtarët e krishterë shqiptarë kanë filluar që prej mesnatës ceremonitë e tyre të shënuara të Krishtlindjes, një nga kremtet më të rëndësishme në kalendarin festave të krishtera.

Pas festave në familje, besimtarët u janë drejtuar kishave dhe katedraleve për meshën solemne të mesnatës.

Në Katedralen e Shën Palit në Tiranë, besimtarët katolikë kanë marrë pjesë në meshën solemne të drejtuar nga Arqipeshkvi Metropolit i Tiranë-Durrësit, Imzot George Frendo.

Në mesazhin e tij, Imzot George Frendo bëri apel për më shumë paqe dhe humanizëm në shoqërinë shqiptare.

Të pranishëm në meshë ishin Presidenti Ilir Meta dhe mjaft personalitete të politikës dhe artit.

Ndërkohë në Katedralen Ringjallja e Krishtit besimtarët ortodoksë kanë marrë pjesë në meshën solemne e cila u drejtua nga Kryepeshkopi i Tiranës, Durrësit dhe të gjithë Shqipërisë, Anastas Janullatos.

“Në Krishtlindje, në të kremten e madhe të ardhjes së Birit dhe Fjalës së Perëndisë brenda njerëzimit, kremtojmë nismën mahnitëse të Perëndisë Atë për t’u pajtuar me gjininë njerëzore. Ati, i shtyrë nga dashuria e Tij e pafund, “dërgoi në botë Birin e tij të vetëmlindur, që të rrojmë me anë të tij”, për ta bashkuar njerëzimin me veten Tij, duke u bërë anëtar i tij – si Perëndinjeri,” tha në mesazhin e tij të Krishtlindjes, Kryepeshkopi Janullatos.

Në vigjilje të Krishtlindjes Arqipeshkvi Metropolit i Tiranë-Durrësit, Imzot George Frendo iu është drejtuar me një mesazh besimtarëve dhe mbarë popullit shqiptarë duke u lutur që nga grazhdi yt o Jezus fëmijë hidhe shikimin tënd mbi Shqipërinë:

“Dhe ne të dashur vëllezër e motra, le të vendosim shpresën tonë në atë që si i rritur ka dhënë shëndet atje ku nuk kishte shpresë për shëndet.

Ruaje o Zot Shqipërinë tonë!

Ndërsa Kryepeshkopi i Tiranës, Durrësit dhe të gjithë Shqipërisë, Anastas Janullatos, në vigjilje të Krishtlindjes duke uruar të gjithë shqiptarët kujtoi me mirënjohje mirëdashjen e Perëndisë që kremtojmë në Krishtlindje:

“Duke marrë pjesë në “shërbesën e pajtimit”, që nisi me Lindjen e Tij në botën tonë, do të bëhemi të denjë të psalim së bashku në mënyrë të ndërgjegjshme “Lavdi Perëndisë në më të lartat dhe mbi dhenë paqe, dhe në njerëzit mirëdashje.

Krishtlindje të bekuara!