Meta i përgjigjet Ramës, tallet me shqiptarët: Presidenti ka nisur procesin e bashkëpunimit me institucionet përgjegjëse…

Presidenca e vlerëson si Përgjigje në kerkesën e re që kryeministri Edi Rama i dërgoi dje Presidentit Ilir Meta, për dekretimin e Sandër Lleshit si ministër i Brendshëm, por kjo përveç se tallje me shqiptarët nuk është asgjë tjetër.

“Prej ditës së djeshme, pas mbërritjes së propozimit, Presidenti i
Republikës Sh.T.Z Ilir Meta ka nisur procesin e bashkëpunimit me
institucionet përgjegjëse për të marrë përgjigje të qarta, të plota dhe shteruese ndaj të gjitha çështjeve për të cilat Presidenti nuk mundi të sqarohej herën e parë, pavarësisht nga përpjekjet e tij të
vazhdueshme për bashkëpunim,” sqaron Zëdhënësi i Presidentit, Tedi Blushi.

Kjo edhe mund të jetë e vërtetë, por nuk është e qartë se si e krijoi Presdienti bindjen për Sandër Lleshin nëse bënë ose jo për ministër të Brendshëm, kur herën e parë, siç e pranon edhe vetë, nuk mundi të sqarohej me institucionet përgjegjëse për të marrë përgjigje të qarta, të plota dhe shteruese ndaj të gjitha çështjeve. Dhe jo vetëm kaq!

Nuk dihet se kush e ka bërë sqarimin për media për ti dhënë përgjigje Edi Ramës, por në talljen e dytë me popullin brenda një sqarimi thuhet:

“Presidenti ka vendosur të informojë mbi kërkesat e tij edhe Kryetarin e Kuvendit, pasi procedura e emërimit të një ministri është proces bashkëpunimi i detyrueshëm e kushtetues midis tre institucioneve (Kryeministri, Presidenti, Kuvendi).”

Si mund të vendos Presidenti që të informoj Kryetarin e Kuvendit  kur siç thotë edhe vetë sqarimi “është proces bashkëpunimi i detyrueshëm e kushtetues”.

Dhe në fund, sqarimi thekson se Presidenti Meta është i vendosur të përmbushë përgjegjësitë e tij kushtetuese me rigorozitet dhe brenda afateve kushtetuese, vetëm në interes të respektimit të Kushtetutës, kur dy prej këtyre detyrimeve që u theksuan më lartë, janë thelbësore, nuk janë realizuar dhe përkundër kësaj Dekreti për refuzimin e Sandër Lleshit për ministër të Brendshëm, mbanë firmën e Presidentit Ilir Meta!

Reagimi i plotë:

Prej ditës së djeshme, pas mbërritjes së propozimit, Presidenti i
Republikës Sh.T.Z Ilir Meta ka nisur procesin e bashkëpunimit me
institucionet përgjegjëse për të marrë përgjigje të qarta, të plota dhe shteruese ndaj të gjitha çështjeve për të cilat Presidenti nuk mundi të sqarohej herën e parë, pavarësisht nga përpjekjet e tij të
vazhdueshme për bashkëpunim.

Lidhur me këtë proces të ri, Presidenti ka vendosur të informojë mbi kërkesat e tij edhe Kryetarin e Kuvendit, pasi procedura e emërimit të një ministri është proces bashkëpunimi i detyrueshëm e kushtetues midis tre institucioneve (Kryeministri, Presidenti, Kuvendi).

Presidenti Meta është i vendosur të përmbushë përgjegjësitë e tij
kushtetuese me rigorozitet dhe brenda afateve kushtetuese, vetëm në interes të respektimit të Kushtetutës dhe forcimit të sigurisë kombëtare ku Ministria e Brendshme ka një rol kyç.