M’fal Azem, Rudinë desha me thanë!
nga Agim Popoci
Mbrëmja e 11 Majit do të mbahet mend për shumë kohë, përveç se pwr dhunën e ushtruar nga policia e Ish-Gjeneral Sandër Lleshajt nën urdhërat e Edi Ramës, edhe për moslejimin e Avokates së Popullit që të vizitoj protestuesit në Spitalin e Traumës dhe deklarimin e Prezencës së OSBE në Tiranë që nuk njeh dhunën e policisë. Nëse këtij absurditeti të demokracisë së Edi Ramës i shtojmë edhe reagimin e Rudina Hajdarit e cila deri në ekstrem po përdor dhe njollos emrin e Babait, kthimi në diktaturë pas 30 viteve tranzicion, merr edhe kuptim.
Dhe derisa në rrjetet sociale dhe media qarkullonin pamje pa fund se si në diktaturën e avancuar të Edi Ramës, shqiptarët nuk torturohen më në birucë por në shesh, madje edhe ata që në gjuhën policore quhen të “neutralizuar” nuk prangosen por rrihen, ndërkohë telefonatat e banorëve që jetojnë pranë Parlamentit dhe Drejtorisë së Policisë pareshtur ankoheshin për jetën që u është bërë ferr në banesat e tyre nga gazi lotsjellës i Ish-Gjeneral Sandër Lleshjat, Shefja e grupit Parlamentar të “Opozitës së Edi Ramës”, Rudina Hajdari, shfaqet e shqetsuar për familjet e zakonshme me fëmijë të vegjël që do të kthehen në shtëpi me frikë nga pasiguria.
M’fal Azem, Rudinë desha me thanë! Ju që nuk dini të numëroni as edhe një viktimë shqiptare në Letoni, nuk ka dyshim pse t’u bënë tre oficerë të vrarë! Dora e gjakpirësit është e rëndë, nuk ngopet me gjak, kjo është dhe arsyeja pse të dhunuar për ty nuk mund të jenë qytetarët që protestojnë por vetëm ata policë që urdhërohen nga Edi Rama. Por Ju kishit komoditetin para se ta qëndisni reagimin për dhunën e ushtruar të protestuesve, që të shqetësoi para Kryeministrisë dhe Parlamentit, sepse “zjarri gjatë natës, për shkak të bombave me Molotov që u hodhën hodhën dhe krijuan këtë pështjellim të kohëve të largqoftit” nuk është real, dhe ne, njerëzit do ta paguajmë, siç thua ti!
Në kohën e, siç thua ti, largqoftit, nuk kishte protesta, lexo historinë e Babait tënd që e zë në gojë aq shumë, dhe ne nuk do ta paguajmë, por vetëm një, Edi Rama, ai që të përdhosi dinjitetin tënd dhe familjes tënde dhe jo vetëm.
M’fal Azem, Rudinë deshta me thanë! Ke krijuar bindjen me morrat e kuq që rri dhe i ke vërdallë, se ndërkombëtarët po qeshin me demokracisë surreale që qenka krijuar në kokat e atyre që protestojnë. Jo moj jo, ata nuk qeshin dot sepse këtë demokraci e kanë krijuar vetë, mjafton të lexosh dy deklarata e OSBE-së. Nëse nuk din misionin e këtij organizmi të rëndësishëm evropian për bashkëpunim dhe siguri, pyet atë “ndërkombëtarin” tënd dhe sqarohu se nuk ka dhunë të Edi Ramës dhe Lulzim Bashës, por dhuna është dhunë. Dhe, që të sqarohesh edhe me veten tënde, policia shërben për ruajtjen e rendit dhe qetësisë publike dhe jo dhunimin e atyre protestuesve të “dhunshëm” që janë të shtrirë për toke. Nëse nuk e kupton shko pak te Avokati i Popullit dhe të sqaron se si në Spital, Edi Rama yt i dashtur lejon të vizitohen policët e plagosur por jo edh protestuesit ose kalimtarët e rastit, që me filmime u dëshmuan se nuk kishin lidhje me protestën për të cilën Ju u shqetësuat se ishte e dhunshme.
M’fal Azem, Rudinë desha me thanë! Thuaj atij “ndërkombëtarit” që të bënë kujdes kur të qëndis shkrimet, sepse kur ti i kërkon llogari Lulzim Bashës, se “im atë nuk bëri gjithë atë sakrificë që një ditë Partia Demokratike të bënte këtë që bëri sot sepse – ju po minoni parimet e paqes, prosperitetit dhe pluralizmit, me keq akoma. Im atë nuk kërkoi t’i japë fund 5 dekadave të sundimit komunist, që Shqiptarët që të jetojnë përsëri në frikë për të nesërmen,” duhet ta dijë mirë kush ishte Azem Hajdari!
Jo moj zonjë jo, ti dhe “ndërkombëtari” keni ngatërruar termat, yt atë nuk bëri sakrificë për Partinë Demokratike por për Shqipërinë, këtë e dëshmoi edhe kur u largua për pak kohë nga kjoparti, dhe sot në frikë shqiptarët jetojnë përsëri sepse kryeministër është Edi Rama, dhe ka një ministër të Brendshëm kriminel që helmon edhe njerëzit që janë në shtëpitë e tyre, në punët e tyre sepse thjeshtë janë komunist por nuk duan të ngatërrohen me dhunën që servir pushteti që ti dhe të ngjashmit të jeni në Parlament.
M’fal Azem, Rudinë desha me thanë! Në këtë lukuninë tënde në shërbim të Edi Ramës e the edhe një të vërtetë: “Mos e quani veten një “demokrat” z. Basha, dhe mos besoni që im atë do të kishte mbështetur veprimet tuaja sonte.”
Kjo është shumë e vërtetë! Sikur të ishte Azem Hajdari gjallë, mbrëmë Partia Demokratike nuk do të organizonte protesta sepse do të ishte në pushtet që nga viti 2015, kur shefi yt, Edi Rama i vodhi zgjedhjet me bandat kriminale. Pra, mbrëmjen e 11 Majit, Lulzim Basha, do të ishte Kryeministër dhe ti nuk do të ishe në parlament me këtë mendësi që ke, kjo është e sigurtë. Azem Hajdari në shumë raste nuk ishte dakord me lidershipin e PD, por kurrë nuk iu bashkua Partisë Socialiste kriminale siç bëre ti, kauza e Azemit ishte kauzë lirie dhe jo krimi dhe vrasjeje!
Dhe për fund, m’fal Rudinë, Azem desha me thanë! Shqipëria si gjithë Evropa, Azem Hajdari, është një parullë që u kthye së bashku me diktaturën sepse nuk e përfillën paralajmërimin tënd: Komunizmi deri sa është gjallë, VRET! Jo vetëm që të vrau, jo vetëm që po vret, por ai të bëri trafikant armësh, kundërshtar të Kosovës për të cilën ti flijove gjithçka, dhe sot po shkatërron familjen tënde dhe jo vetëm.
Sot, komunizmi është më i egër se kurrë, bëri aleancë me Rudinën por jo me gjakun tënd. Mbi shpatullat e Kirit sot kanë rënë shumë përgjegjësi, por si asnjëherë më parë, si Ai ashtu edhe të gjithë demokratët të ndjejnë në mesin e tyre, sa më e ashpër po bëhet lufta komuniste.
Sot si 28 vjet më parë, me shpirt të madh përballë ushtrisë dhe policisë së armatosur komuniste, të rinjtë janë të sigurt se do ta çojnë deri në fund misionin tënd të filluar kundër kriminelëve komunist.
Prehu i qetë Azem Hajdari, kjo tashmë është e sigurt sepse në çdo lëvizje qerpiku, në çdo frymëmarrje të rinisë demokratike, vetëm një gjë mund të konstatohet, jo pse këtë e don Lulzimi apo e kundërshton Rudina, por sepse durimi është sosur dhe ka vetëm një rrugë, ajo e Azem Hajdarit:
Azem ti je gjallë!
