Mike Pompeo: Assange do të ekstradohet në SHBA

Britani e Madhe do ta ekstradojë  themeluesin e WikiLeaks, Julian Assange, në SHBA në mënyrë që të gjykohet për spiunim, ka bërë të ditur sot e përditshmja ekuadoriane “El Universo” duke cituar Sekretarin amerikan të Shtetit, Mike Pompeo.

“Ne e kemi dërguar kërkesën dhe ai do të ekstradohet  në SHBA, ku do të gjykohet,” tha Pompeo.

“Nuk mund të komentoj më shumë, por qeveria ime mendon se është e rëndësishme që ky njeri i cili rrezikoi botën dhe ushtarët amerikanë, duhet të dal para gjykatës,” tha Sekretari amerikan i Shtetit pas takimit me Presidentin Lenin Moreno në Ekuador.

Ndryshe, SHBA akuzon Julian Assangin për spiunim dhe ka kërkuar ekstradimin e tij. Shqyrtimi i kësaj kërkese do të bëhet në muajin shkurt të vitit 2020 në Britaninë e Madhe.

Assange aktualisht është duke vuajtur dënimin 50-javor për shkak të shkeljes së kushtit që kishte lënë si garanci, pasi kaloi 7 vjet në Ambasadën e Ekuadorit në Londër në mënyrë që të mos ekstradohet në Suedi ku akuzohej për përdhunim.