“Milano-Kortina 2026”, Papa Leoni XIV: Në kohë lufte, sporti nxit logjikën e takimit
Në takim me pjesëmarrësit në Lojërat Olimpike dhe Paralimpike Milano-Kortina 2026, në Vatikan, Papa Leoni XIV tha se filozofia e fitores pa e poshtëruar tjetrin dhe e humbjes pa e humbur vetveten vlen edhe për politikën dhe për marrëdhëniet ndërmjet popujve, ndërsa foli edhe kundër tundimit të fitimit, që e transformon lojën në treg.
Në një botë të karakterizuar nga konflikti dhe përçarja, sporti mbetet një hapësirë, në të cilën logjika e dhunës bie poshtë, për t’ia lënë vendin logjikës së takimit. Duke pritur atletët e Lojërave Olimpike dhe Paralimpike Milano-Kortina 2026, Papa Leoni XIV theksoi se sporti, përtej garës e konkurrencës, përfaqëson një gjuhë universale sakrifice, disipline dhe marrëdhëniesh.
Kur arrihet fitorja nuk është fjala vetëm për rezultat. Përpjekjet e sportistëve për ta arritur atë përbëjnë “histori”, që zbulon vlerën e kufirit njerëzor, veçanërisht në përvojat paralimpike, ku brishtësia shndërrohet në pasuri e dëshmi. Në këtë kuptim, sporti bëhet shkollë jete, që mëson si të përjetohen vërtetësisht marrëdhëniet dhe suksesi.
“Vërtet, sporti, kur përjetohet vërtetësisht, nuk është vetëm shfaqje: kthehet në një formë shprehjeje, në një gjuhë” universale.
Fitorja pa poshtërim: një model përtej sportit
Papa kujtoi një parim qendror: të dish si të fitosh pa e poshtëruar tjetrin dhe të humbasësh, por pa e humbur vetveten. Kjo logjikë i kapërcen kufijtë e sportit e zbatohet edhe në politikë dhe në marrëdhëniet ndërmjet popujve. Ati i Shenjtë i këshilloi sportistët të jenë të vetëdijshëm se çdo sukses është i përbashkët: pas çdo atleti qëndron një rrjet njerëzish, sakrificash dhe mbështetjeje.
Sporti mëson ekuilibrin ndërmjet trupit dhe shpirtit, duke e edukuar njeriun si të sillet me emocionet, si të pranojë humbjen dhe si ta jetojë konkurrencën pa e humbur ndjenjën e vëllazërimit. Suksesi i vërtetë, në fakt, matet me cilësinë e marrëdhënieve dhe të gëzimit të përbashkët, jo me çmime.
“Të thyejmë logjikën e dhunës për të promovuar logjikën e takimit”, bëri thirrje Papa Leoni XIV.
Sfidat dhe tundimet e sportit bashkëkohor
Krahas vlerave pozitive, Ati i Shenjtë vuri në dukje teprimet e sportit modern: ndjekja e rezultatit me çdo kusht, rreziku i dopingut, logjika e fitimit dhe spektakolarizimi, që e redukton atletin, thjesht, në imazh.
Përballë këtyre sfidave, atletët duhet të jenë dëshmitarë të një stili të ndryshëm, në të cilin personi mbetet në qendër. Sporti mund të bëhet kështu “laborator i njerëzimit të pajtuar”, i aftë t’u japë vlerë dallimeve dhe të promovojë impenjimin e përbashkët edhe para sfidave të mëdha globale, siç është ajo e ambientit.
“Vazhdoni të siguroheni që personi të mbetet në qendër të sportit në të gjitha shprehjet e tij”: kjo, këshilla e fundit e Papës Leoni XIV për sportistët./vaticannews/
