Milorad Dodik dënohet me vendim të formës së prerë, 1 vit burg!

Milorad Dodik, presidenti i entitetit serb të Bosnje Hercegovinës, Republika Srpska, është dënuar sot me vendim të formës së prerë, për mosrespektim të vendimeve të Përfaqësuesit të Lartë.

Trupi gjykues e ka konfirmuar aktgjykimin e shkallës së parë të 26 shkurtit, me të cilin Milorad Dodik është dënuar me një vit burgim dhe ndalim prej gjashtë vjetësh për ushtrimin e funksioneve politike.

Aktgjykimin e ka shpallur trupi gjykues prej tre anëtarësh, i përbërë nga Amella Huskiç, Vesna Jesenkoviç dhe Hillmo Vuçiniç.

Siç u bë e ditur nga Gjykata e Bosnje Hercegovinës, aktgjykimi u është dërguar palëve sot dhe kundër tij nuk lejohet ankesë.

Milorad Dodik, në një konferencë të jashtëzakonshme për media në Banjallukë, tha se nuk e pranon dënimin.

“Institucionet e RS-së do ta përcaktojnë qëndrimin e tyre për këtë çështje. Unë do të pranoj çdo vendim të parlamentit, por këtë vendim nuk e pranoj,” tha Milorad Dodik duke paralajmëruar se Parlamenti i Republika Srpskas do të miratojë vendime të reja dhe se duhet të hartohet një plan i qartë për të dalë nga kjo situatë, pa dhënë hollësi se për çfarë vendimesh bëhet fjalë.

“Të gjitha vendimet tona do të jenë politike. Gjykata e Bosnjë e Hercegovinës është diskualifikuar si organ juridik,” tha Dodik, duke shtuar se nuk do të ketë zgjedhje të jashtëzakonshme në RS.

“Zgjedhje nuk do të ketë përderisa jam unë president. U bëj thirrje bashkëpunëtorëve të mos lejojnë mbajtjen e zgjedhjeve të jashtëzakonshme dhe policisë që të ndalojë hapjen e çfarëdo vendvotimi”, u shpreh ai.

Dodik tha gjithashtu se pret mbështetjen e Serbisë dhe se do t’u drejtohet edhe Rusisë dhe Shteteve të Bashkuara.

Avokati i Dodikut, Goran Bubiç, tha pas shpalljes së aktgjykimit se do të dorëzohet një ankesë në Gjykatën Kushtetuese të Bosnje Hercegovinës, me qëllim që të tentohet kontestimi i tij.

“Do të kërkojmë edhe një masë të përkohshme për të pezulluar zbatimin e aktgjykimit deri në vendimin e Gjykatës Kushtetuese të Bosnje Hercegovinës,” tha Bubiç sot në Banjallukë, duke shtuar se këto janë hapa të nevojshëm për të vijuar me ankesën në Gjykatën Evropiane për të Drejtat e Njeriut.

Kundër aktgjykimit të shkallës së parë të Gjykatës së Bosnje Hercegovinës kanë ushtruar ankesë si ekipi juridik i Dodikut, ashtu edhe Prokuroria e Bosnje Hercegovinës.

Prokuroria ka kërkuar ashpërsimin e dënimit me burg, si dhe zgjatjen e ndalimit për ushtrimin e funksioneve, ndërsa mbrojtja ka kërkuar anulimin e aktgjykimit.

Dodik është shpallur fajtor për nënshkrimin e dekretit për shpalljen e ligjeve që më herët ishin anuluar nga Përfaqësuesi i Lartë në Bosnje Hercegovinë, Christian Schmidt.

Me këto ligje, organet legjislative të Republikës Srpska kishin tentuar të pengonin zbatimin e vendimeve të Gjykatës Kushtetuese të Bosnje Hercegovinës dhe të Përfaqësuesit të Lartë në territorin e këtij entiteti.

I pandehuri i dytë në këtë proces, Milosh Lukiq, ushtrues detyre i drejtorit të Gazetës Zyrtare të RS-së, i cili kishte publikuar ligjet kontestuese, është shpallur i pafajshëm në shkallën e parë.

Menjëherë pas aktgjykimit të shkurtit, Parlamenti i Republikës Srpska miratoi një mori ligjesh që parashikonin heqjen e kompetencave të institucioneve shtetërore të drejtësisë dhe sigurisë në territorin e RS-së, ndërsa ndaj Dodikut, Gjykata e Bosnje Hercegovinës shpalli një urdhërarrestim në mes të marsit, nën dyshimin për sulm ndaj rendit kushtetues.

Për të njëjtat dyshime, është lëshuar urdhërarrestim edhe për Radovan Vishkoviçin dhe Nenad Stevandiçin, përkatësisht kryeministrin e Republikës Srpska dhe kryetarin e Parlamentit të këtij entiteti.

Megjithëse urdhrarrestimi nënkupton që të gjitha agjencitë policore në vend duhet t’i arrestojnë dhe t’i dorëzojnë në kompetencë të organeve shtetërore të drejtësisë, një gjë e tillë nuk ndodhi në muajt që pasuan.

Në fillim të korrikut, Milorad Dodik u paraqit vullnetarisht në Prokurorinë e Bosnje Hercegovinës, i shoqëruar nga avokati i tij, Goran Bubiç. Atij iu hoq masa e paraburgimit dhe iu caktua detyrimi për paraqitje të herëpashershme para një organi shtetëror.

Pak ditë më vonë, Vishkoviç dhe Stevandiç po ashtu u paraqitën vullnetarisht në Gjykatë dhe edhe atyre iu hoq masa e paraburgimit./RFE/