Minatorët e Trepçës dhe Artanës në grevë, nuk morën as pagat e janarit

Mbi 200 minatorë të Trepçës dhe mbi 300 minatorë të Minierës së Artanës kanë hyrë në grevë, pasi nuk i janë përmbushur kushtet bazë madje nuk kanë marrë as pagat e muajit janar.

“Arsyeja kryesore pse jemi futur në grevë është mosekzekutimi i pagave për muajin shkurt,“ tha Mustafë Osmani nga Sindikata e Re e Trepçës pas fillimit të grevës së radhës për shkak të pagave.

Situatë e ngjashme është dhe me minatorët e Artanës.

“Komplet njësia punëtorë që janë diku përmi 300 punëtorë janë në grevë prej ditës së sotme zyrtarisht edhe pse që tri ditë i kemi paralajmëruar dhe kemi shpreh pakënaqësi të pagës. Prej sot jemi zyrtarisht në grevë dhe arsyeja është mos-realizimi i pagës, pra rroga e muajit janar. Ka disa që i kanë marrë 70% të pagës e të tjerët as at 70%,” tha përfaqësuesi i minatorëve, Blerim Ymeri duke shtuar se kërkesat janë paraqitur më parë, por që nuk janë marrë parasysh pra s’kanë gjetë arsye as të bisedojnë me ta.

“As nga Qeveria nuk na ka kontaktuar askush ende, edhe pse patën pas ti alokojnë 1.7 milionë euro, nga subvencioni por nuk janë aloku as ato.”

Ndryshe minatorët e Kosovës ka kohë që përballen me probleme të ngjashme, ku mosalokimi i pagave dhe kushtet bazë shpesh mungojnë.