“Mini Shengeni”/ Ohër, Edi Rama hesht Vuçiç flet për miratimin e Planit të Veprimit

Kryeministri Edi Rama, Presidenti i Serbisë, Aleksandar Vuçiç dhe Kryeministri i Maqedonisë së Veriut, Zoran Zaev janë takuar në Ohër për të vazhduar negociatat për “Mini Shengenin Ballkanik” ndonëse nuk u përqafua nga vendet e Ballkanit.

Dhe, derisa Edi Rama hesht dhe nga takimi publikon vetëm këtë video prej disa sekondash, presidenti serb Aleksandar Vuçiç ka paralajmëruar se qysh nesër kur pritet të vazhdoj takimi në mëngjes, do të miratohen masa konkrete për realizimin e qarkullimit të lirë të njerëzve, mallrave, shërbimeve dhe kapitalit.

Edhe pse e gjitha kjo është absurde kur dihet që të gjitha këto shtete me përjashtim të Kosovës i gëzojnë këto liri me liberalizimin e vizave dhe Marrëveshjen CEFTA, Vuçiç si teoricien i njohur i mashtrimeve ballkanike pa çitjane dhe atlete, duke e pranuar për Televizionin publik të Serbisë se kjo ishte ide e tij, paralajmëron se në Ohër do të miratohet një Plani Veprimi, propozimin e të cilit u ka dërguar shumë kohë më parë, Edi Ramës dhe Zoran Zaevit.

Ndryshe, pas takimit të nesërm në mëngjes, Rama, Vuçiç dhe Zaev do të bisedojnë edhe me përfaqësuesit e organizatave dhe institucioneve ndërkombëtare, dhe në orën 12:00 do të mbajnë një konferencë të përbashkët për shtyp.