Mini Shengeni, Rama-Vuçiç-Zaev më 29 Korrik firmosin Marrëveshje në Shkup

Kryeministri Edi Rama, ai i Maqedonisë Veriut, Zoran Zaev, së bashku me shantazuesin më të madh ballkanik, Presidentin e Serbisë, Aleksandar Vuçiç, sot në konferencën “Mini Shengeni” shprehën dëshirën që katër liritë evropiane, lëvizja e njerëzve, mallrave, shërbimeve dhe kapitalit të fillojnë të zbatohen sa më shpejtë në rajon, e në këtë kontekst do ti ofrojnë mbështetje të plotë tregut të përbashkët rajonal në Samitin e Procesit të Berlinit që do të mbahet më 5 korrik, bënë të ditur përmes një komunikate Presidenca e Serbisë.

Palët ranë dakord, thuhet në komunikatën e Presidencës së Serbisë, se shteteve të Ballkanit Perëndimor u duhet anëtarësimi në BE, por edhe Bashkimit Evropian i duhet po aq Ballkani Perëndimor, meqë rajoni është i rrethuar me kufijt e BE, e shtetet që aplikojnë ndajnë vlerat e përbashkëta evropiane.

Ndonëse Vuçiç ngelet pengesa kryesore e përparimit të Malit të Zi, Bosnjes dhe Kosovës, ai me Edi Ramën dhe Zoran Zaevin diskutuan përmes video konferencës për hapat e mëtejmë të bashkëpunimit rajonal, si proces, siç thuhet, me rëndësi jetike për përparimin e Ballkanit Perëndimor dhe rrugës evropiane në tërësi.     

“I bëjmë thirrje  dhe nxisim kolegët tanë nga rajoni që  të firmosin dhe zbatojnë marrëveshje të ngjashme, në mënyrë që vizioni i hapësirës së përbashkët politike dhe ekonomike në gjithë Ballkanin Perëndimor, përmes tregut të përbashkët, të bëhet pjesë e rëndësishme e përditshmërisë tonë,” ishte porosia nga konferenca “Mini Shengeni” e Kryeministrit Edi Rama, Kryeministrit të Maqedonisë së Veriut, Zoran Zaev dhe njeriut që aktualisht pengon Kosovën të jetë pjesë e këtij tregu të përbashkët duke shantazhuar Bosnje Hercegovinën dhe Malin e Zi.

Në fund, pjesëmarrësit e kësaj video konference që ka për synim realizimin e ëndrrës serbe nga viti 1946 për unifikimin doganor e tregtar të Shqipërisë me Serbinë, meqë Maqedoninë e konsiderojnë fakt të kryer me LSDM-n proserbe në pushtet, ranë dakord që takimin e radhës ta zhvillojnë në Shkup më 29 Korrik, ku do të analizohet përparimi i iniciativave dhe projekteve të firmosura, si dhe të firmosen marrëveshjet tjera në mes të këtyre tri shteteve lidhur me bashkëpunimin dhe ndihmën në rast të katastrofave natyrore si dhe lehtësimeve në tregti, eksport dhe import.