Ministri britanik: Putin ka përgjegjësi përfundimtare për helmimin kundër Skripalëve

Presidenti rus, Vladimir Putin ka përgjegjësi përfundimtare për helmimin me agjent nervor kundër ish-spiunit rus, Sergei Skripal dhe vajzës së tij Yulia në muajin mars në Angli, tha ministri britanik për Siguri, Ben Wallance.

Ai tha sot se Putin “kontrollon, financon dhe drejton” inteligjencën ushtarake të Rusisë, të njohur si GRU, të cilën Britania e ka akuzuar për përdorim të agjentit nervor, Noviçok, kundër Skripalëve, raporton RFE.

Të dy i kanë mbijetuar sulmit, derisa tani është raportuar se janë duke u shëruar në një lokacion sekret.

I pyetur nëse Putin ka qenë përgjegjës për sulmin, Wallance ka thënë për BBC-në se “në fund ka qenë ai, pasi si president i Federatës Ruse, Qeveria e tij është përgjegjëse për kontrollimin, financimin dhe drejtimin e inteligjencës ushtarake”.

“Nuk mendoj se dikush mund të thotë ndonjëherë se Putin nuk e kontrollon shtetin e tij”, ka thënë Wallance.

Një shtetase britanike, Dawn Sturgess, ka vdekur në muajin qershor ndërsa i dashuri i saj Charlie Rowley ishte sëmurë pasi kishin kaluar në disa mbetje të helmit.

Rusia ka hedhur poshtë çdo përfshirje në helmim dhe ka thënë se është e gatshme të bashkëpunojë në hetime.

Më 5 shtator, Britania ka nisur akuza në mungesë kundër dy shtetasve rusë, të cilët janë identifikuar si Aleksandr Petrov dhe Ruslan Boshirov.

Që të dy besohet se janë agjent të GRU-së.

Kryeministrja britanike, Theresa May, i ka thënë Parlamentit se sulmi është miratuar në “nivele të larta të shtetit të Rusisë”.