Ministri i Brendshëm: Drejtori i ri i Policisë, Muhamet Rrumbullaku!

Këshilli i Ministrave emëroi sot Drejtor të Përgjithshëm të Polciisë së Shtetit, Muhamet Rrumbullakun. Vendimin e bëri publik, ministri i Brendshëm, Bledi Çuçi.

“Zoti Rrumbullaku është oficer karriere i lartë në policinë e Shtetit që ka mbajtur e kryer shumë detyra në gjithë piramidën e Policisë së Shtetit. I vlerësuar në cdo pozicion që ka qenë dhe i vlerësuar gjithashtu dhe së fundmi në pozicionin që ka mbajtur deri javen e kaluar të drejtorit të Agjencisë së Mbikëqyrjes Policore. Është drejtori që reformoi agjencinë që është kthyer në agjenci civile dhe rezultatet e reformës kanë filluar të ndihen ndërkohë. Zoti Rrumbullaku mban gradën e ‘Drejtuesit të Parë’ në piramidën e Policisë së Shtetit dhe plotëson të gjitha kushtet për të qenë Drejtor i Përgjithshëm i Policisë së Shtetit.

Në orën 16:00 do bëjmë një prezantim të gjerë të Zotit Rrumbullaku dhe dy drejtorëve të tjerë të agjencive të Ministrisë së Brendshme, drejtoreshës së re të IKMT dhe drejtorit të ri të Agjencisë së Mbikëqyrjes policore,” tha ministri Bledi Çuçi ndërsa iu përgjigj edhe interesit të mediave lidhur me deklaratën Ish-Drejtorit të Përgjithshëm të Policisë së Shteit, Gledis Nano, i cili për mediat franceze tha se 14 kriminelë kishin arritur të arratiseshin për shkak të dekonspirimit të operacioneve.

“Është pjesë e punës së përditshme që ka Policia e Shtetit dhe AMP për të pastruar policinë nga këta kriminelë që dekonspirojnë operacionet. Në lidhje me deklaratën, kur se di drejtori i përgjithshëm kur ishte në detyrë, vështirë se do e di ministri. Është në hapësirën e informacionit që ka drejtori i policisë. Do ta hetojmë dhe do ta thellojmë hetimin dhe do përfshihet edhe ish-drejtori që ka bërë këtë deklaratë, për të zbardhur të vërtetën.”