Ministri i Jashtëm i Rusisë, Sergey Lavrov arrin në Beograd
Ministri i Jashtëm rus, Sergey Lavrov ka nisur sot vizitën e tij zyrtare në Beograd. Rreth orës 10:45, ai është pritur në Aeroportin “Nikolla Tesla”, nga Ministri i Punëve të Jashtme të Serbisë, Ivica Daçiç.
Menjëherë pas arritjes së tij, Lavrov, është takuar me Presidentin e Serbisë, Aleksandar Vuçiq, dhe më pas është planifikuar një konferencë për media.
Në kuadër të vizitës së tij në Beograd, Lavrov do të takohet edhe me ministrin Daçiç, si dhe me ministrin e Brendshëm serb, Nebojsha Stefanoviç, me të cilin do të nënshkruajë një marrëveshje për bashkëpunim midis qeverive të Serbisë dhe Rusisë në luftën kundër terrorizmit.
Vizita e Lavrovit në Beograd vjen dy ditë para zgjedhjeve të përgjithshme në Serbi dhe më pak se 12 orë para heshtjes parazgjedhore.
Një javë para vizitës së zyrtarit rus, përkatësisht më 12 qershor, ambasadori rus në Serbi, Aleksandar Bocan-Kharchenko, tha për Radio Televizionin e Serbisë, RTS, se Kosova do të jetë një nga temat kryesore të diskutimit gjatë kësaj vizite.
Duke folur për pritjet e kësaj vizite, Daçiç tha një ditë më parë se “Rusia do të mbështesë çdo zgjidhje që është në interes të Serbisë dhe atë që dëshiron Serbia”.
Gazetari dhe analisti i politikës së jashtme, Boshko Jakshiç tha se vizita e Lavrovit në Serbi ishte paralajmëruar para njoftimit të të dërguarit special të Shtëpisë së Bardhë për negociata midis Beogradit dhe Prishtinës, Richard Grenell, për organizimin e një takimi në mes të presidentëve të Kosovës dhe Serbisë, Hashim Thaçi dhe Aleksandar Vuçiç, më 27 qershor, në Washington.
Jakshiç beson se Rusia ka arsye për t’u shqetësuar dhe për RFE ka vlerësuar se Moska me siguri po monitoron me kujdes përshpejtimin e ngjarjeve rreth Kosovës dhe angazhimin e Shteteve të Bashkuara.
“Afrimi i çdo zgjidhjeje mund të prishë konfliktin e ngrirë, dhe konflikti i ngrirë është në thelb në interesin më të madh të Rusisë – të mbetet si një levë e ndikimit të zgjatur, kryesisht mbi Serbinë,” tha ndër të tjera Jashkiç.
