Ministri i Mbrojtjes: SHBA do të na ndihmojë në ngritjen e kapaciteteve strategjike ushtarake!
Pas mbledhjes së qeverisë ku u miratua nisma për marrëveshjen kornizë me Shtetet e Bashkuara në fushën e Mbrojtjes, Ministri i Mbrojtjes, Ejup Maqedonci, sqaroi se bashkë me SHBA-të do të ndërtojnë plane dhe do të kenë mbështetjen e tyre për anëtarësimin e Kosovës në NATO.
“SHBA-të janë zotuar përmes kësaj marrëveshje se do të mbështesin Kosovën në aspektin teknik, procedural, drejt anëtarësimit në NATO e iniciativa regjionale,” tha Ejup Maqedonci duke shtuar se kjo marrëveshje është e dyta e këtij lloji në Kosovë, pas asaj që kishin nënshkruar me Turqinë vitin e kaluar.
“Janë pesë pika kryesore për të cilat jemi dakorduar për bashkëpunim me SHBA. Planifikimi i mbrojtjes dhe qeverisja e mbrojtjes, pra SHBA do të mbështetë Ministrinë e Mbrojtjes për një planifikim profesional, të mirëfilltë të mbrojtjes, me synim rritjen e mbikëqyrjes civile.
Menaxhimi i resurseve humane dhe menaxhimi i resurseve humane dhe atyre të mbrojtjes, gjithashtu do të jenë fusha ku do të bashkëpunojmë. Ndërtimi i kapacitete strategjike, SHBA-të do të mbështesin Kosovën në ndërtimin e kapaciteteve strategjike ushtarake duke përfshirë edhe mbrojtjen ajrore, kapacitetet ajrore edhe fushat tjera që ne po punojmë t’i ndërtojmë në fazën e tretë të tranzicionit,” tha Ministri i Mbrojtjes duke saktësuar se kjo marrëveshje, parashikon dhe një element të rëndësishëm, të mbështetjes që do të kenë në aspektin e zbatimit, atë të qëndrueshmërisë strategjike.
“Përveç mbështetjes që do t’i japin SHBA-të, ndërtimit të kapaciteteve tona ushtarake, mbrojtjes ajrore, këmbësorisë, artilerisë dhe gjithë elementëve ushtarak, do të ndihmojnë Kosovën që të ndërtojë një qëndrueshmëri kolektive edhe jashtë u ushtrisë, përmes organizimit të qytetarëve dhe strukturave tjera shtetërore,” tha Maqedonci duke folur për detajet e marrëveshjes ndërsa Kosova, sipas tij, do vazhdojë të ndërtojë kapacitetet ushtarake dhe sistemin e gjithëmbarshëm, si dhe do vazhdojë të kontribuojë për paqen e sigurinë në botë.
“Po vazhdojmë edhe zhvillimin e industrisë së mbrojtjes, me hapa më të përshpejtuar që vendi jonë të ketë vetë qëndrueshmëri të kapaciteteve të mbrojtjes,” tha Ministri i Mbrojtjes, Ejup Maqedonci ndërsa bëri të ditur duke përfunduar dhe një iniciativë që ai e konsideron të veçantë, mes Kosovës, Shqipërisë e Kroacisë.
“Gjatë javës së ardhshme do të kemi një ngjarje të veçantë që do të realizohet në Shqipëri, një iniciative regjionale e cila do të formohet pikërisht javën e ardhshme dhe detajet do të bëhen të ditura ditët në vazhdim, për çka është punuar pothuajse një vit bashke me Kroacinë e Shqipërinë dhe shënon një iniciativë të tillë të parë në rajonin e Ballkanit Perëndimor.”
Ndryshe, sot Kryeministri i Kosovës, Albin Kurti, e ka quajtur të një rëndësie të veçantë pikën e parë të rendit të ditës të mbledhjes së sotme të Qeverisë, shqyrtimin e nismës për lidhjen e marrëveshjes kornizë për bashkëpunim në fushën e mbrojtjes ndërmjet Kosovës dhe Shteteve të Bashkuara.
Kryeministri i Kosovës tha se me këtë marrëveshje do të angazhohen për avancimin e bashkëpunimit e ndërsjellë në planifikim të mbrojtjes, qëndrueshmërisë strategjike dhe ngritjes së kapaciteteve strategjike ushtarake.
