Ministri i Shëndetësisë: Bartja e maskave, obligative

Ministri i Shëndetësisë i Kosovës, Armend Zemaj, tha se çdokush që shkel masat parandaluese kundër koronavirusit do të marrë përgjigjen ligjore. Zemaj tha se zbatimi i masave do të mbikëqyret nga inspektorët sanitarë të Agjencisë së Ushqimit dhe Veterinarisë së Kosovës dhe inspektorët komunalë.

“Rekomandimet parandaluese për Covid-19 [sëmundjen që e shkakton koronavirusi] të Institutit Kombëtar të Shëndetit Publik të Kosovës përfshijnë 22 masa të veçanta, që patjetër duhet të respektohen,” tha Zemaj duek reaguar përmes rrjetit social Facebook duke shtuar se bartja e maskave është obligative.

Masat e tjera të veçanta, raporton RFE, përfshijnë: distancën fizike, dezinfektimin, ajrosjen e lokaleve, higjienën e të tjera.

Kosova, në ditët e fundit, ka regjistruar rritje të mprehtë të numrit të rasteve me koronavirus.

Aktualisht ka 2,799 raste të konfirmuara; prej tyre, 1,506 janë shëruar, ndërsa 50 kanë vdekur.

Kryeministri i Kosovës, Avdullah Hoti, tha dje se situata me koronavirus në Kosovë është nën kontroll të brishtë ndërsa paralajmëroi masa të reja duke shtuar se Kosova është në rrezik nga vala e dytë e koronavirusit.