Ministri i Sportit: Stadiumi i Gjilanit po bëhet, ndahen 15 milionë euro

Ministri i Kulturës, Rinisë dhe Sportit i Kosovës, MKRS, Hajrullah Çeku bëri të ditur se ka firmosur marrëveshjen me Kryetarin e Komunës Gjilan, Alban Hyseni, për ndërtimin e stadiumit të qytetit në Gjilan, dhe ka ndarë 15 milionë euro.

“Projekti përfundimtar i Stadiumit të Gjilanit, i cili mungonte, tash është hartuar dhe i gatshëm për zbatim ndërsa buxheti i nevojshëm për financimin e zbatimit veçse është siguruar. Në marrëveshjen e sotme me kryetarin Alban Hyseni, zotuam 15 milionë euro për ndërtimin e stadiumit. Procedurat e nevojshme për zbatimin e projektit do të fillojnë menjëherë dhe punimet në tërësi do të nisin sa më parë,” shprehet Hajrullah Çeku përmes rrjetit social Facebook duke veçuar planifikimin e duhur, si thelbësor për suksesin e çdo projekti.

“Kështu po sigurohemi se ajo çfarë ka ndodhur në qeverisjet e kaluara të mos përsëritet më. Për shkeljet që janë gjetur në të kaluarën e këtij stadiumi, tanimë të kualifikuara si të tilla edhe nga Zyra Kombëtare e Auditimit, ndaj palëve të përfshira po përgatitet kallëzim penal,” tha ministri i Kulturës, Rinisë dhe Sportit duke përfunduar:

“Me vendosmëri po e realizojmë planin investiv për Lojërat Mesdhetare 2030. Po krijojmë një të ardhme më të mirë për sportin në Kosovës.”

Në fund, këtë marrëveshje e ka konsideruar shumë të rëndësishme për Gjilanin edhe Kryetari i Komunës. Alban Hyseni.

“Si një nga projektet më të mëdha të komunës sonë dhe pas sfidave të shumta që na janë shfaqur tash e 2 vite për implementimin e tij, bashkë me nivelin qendror do të angazhohemi maksimalisht për zhvillimin e projektit të stadiumit të kategorisë 4 në Gjilan!”