Ministri Krasniqi: Absurde që ura mbi Ibër të vazhdojë të jetë e mbyllur! Serbët protestojnë, s’duan hapjen!

Ndonëse debati “Bashkëpunimi ndëretnik” në Komunën e Mitrovicës së Veriut ishte menduar t’i shërbej sqarimit të idesë për hapjen e urës mbi lumin Ibër, serbët e përdorën për të protestuar kundër hapjes së urës dhe duke hyrë në sallën ku po mbahej debati janë përplasur verbalisht me zëvendësdrejtorin e Policisë së Kosovës, Veton Elshani, ndërsa i kërkuar llogari për arrestimin e Aleksandar Arsenijeviçit.

Ministri i Administrimit të Pushtetit Lokal, Elbert Krasniqi, tha se hapja e urës mbi lumin Ibër është një veprim i duhur dhe do t’i ndihmojë bashkëpunimit dhe mirëkuptimin ndërmjet komuniteteve, dhe se një gjë e tillë është paraparë shumë vjet më parë në kuadër të marrëveshjes së arritur në Bruksel.

“Në atë plan thuhet se rivitalizimi i urës do të kontribuojë shumë në lehtësimin e kontakteve ndërmjet të gjithë qytetarëve të Mitrovicës së Veriut dhe Mitrovicës së Jugut dhe kështu do të kontribuojë në zhvillimin dhe mirëkuptimin e tyre. Konsideroj se jo vetëm që nuk ka arsye, por edhe është absurde vazhdimi i mbajtjes së urës mbyllur.

Sipas vetë natyrës së urave kjo urë duhet të jetë në shërbim të të gjithë qytetarëve dhe hapja e saj nuk do të jetë dhe nuk është kundër askujt. Jemi të bindur se liria e lëvizjes dhe sundimi i ligjit nuk e rrezikon paqen dhe sigurinë, por përkundrazi e sforcon atë,” tha Elbert Krasniqi gjatë debatit “Bashkëpunimi ndëretnik” në Komunën e Mitrovicës së Veriut, ku ishin prezent edhe kryetari i kësaj komune, Erden Atiq, Zv/Drejtori rajonal i Policisë së Kosovës, Veton Elshani, shefja e kabinetit të MPB-së, Jeta Tela, si dhe   qytetarë e pjesëtarë të shoqërisë civile.

“Për një qytetari aktive nevojitet edhe roli i qytetarisë aktive, shoqëria civile duhet t’i mbajë të informuar qytetarët,” tha Ministri i Administrimit të Pushtetit Lokal, Elbert Krasniqi, duke shtuar se Qeveria e Kosovës ka mbështetur qytetarët në përgjithësi, e sidomos qytetarët e komunitetit serb për t’u pajisur me dokumente, gjë që sipas tij ka shënuar rritje..

Ndërkaq kryetari i Komunës së Mitrovicës së Veriut, Erden Atiq, theksoi se gjatë qeverisjes së tij janë munduar që t’i zgjidhin shqetësimet e qytetarëve.

“Kemi të bëjmë me një komunë komplekse, po punojmë me punë të mirëllogaritura që mos të shkaktojmë pakënaqësi. Mbi 90 përqind të qytetarëve që kanë halle dhe brenga i kemi takuar dhe jemi munduar me i zgjidhë hallet e tyre. Demokratizimi është shumë me rëndësi për mua. Sa i përket temës së qarkullimit te lëvizjes së lirë jemi të hapur t’i dëgjojmë brengat dhe t’ju përgjigjemi.”

Serbët protestojnë

Në këtë debat ishin shumë pak serb, dhe ata që ishin arsyeja e tyre madhore ishte krijimi i një rrëmuje në mënyrë që takimi të dështoj por prezenca e Zv/Drejtorit të Policisë së Kosovës për rajonin e veriut, Veton Elshani, bëri që të sqarohen dhe ata që veten e quanin anëtarë të partisë “Demokracia Serbe”.

Pas një përplasje verbale me Zv/Drejtorin e Policisë së Kosovës për rajonin e veriut, Veton Elshani, ku i kërkuan llogari pse ishte arrestuar lideri i partisë së tyre, Aleksandar Arsenijeviç, Elshani i ka ftuar ata që të ulen dhe të diskutojnë lidhur me debatin e sotëm, derisa për arrestimin do t’i informojë po sa të ketë informacione të sakta, pasi ishte pjesë e debatit.

Pas marrjes së informacioneve, zyrtari i Policisë së Kosovës, Veton Elshani, ka sqaruar këtë grup të serbëve që po bënin rrëmujë, se punëtorët që janë të kontraktuar për të bërë lyerjen e mureve te ura dhe në afërsi të urës janë penguar ta kryejnë punën e tyre. Me këtë rast ka ndërhyrë policia dhe ka ndaluar disa persona, në mesin e të cilëve raportohet se është edhe lideri i kësaj partie, Aleksandar Arsenijeviç.

Gjithsesi, Zv/Drejtorin e Policisë së Kosovës për rajonin e veriut, Veton Elshani, i ka ftuar këta serbë që të bëhen pjesë e debatit të sotëm ku po diskutohej për hapjen e urës dhe të shprehen përse nuk duhet të hapet ura, ku ai do të japë dhe arsyet pse Ura mbi lumin Ibër në Mitrovicë, duhet të hapet.