Ministri në detyrë i Drejtësisë i kërkon Kryeprokurorit të Shtetit t`i nis hetimet ndaj Kryeprokurorit në Mitrovicë
Ushtruesi i detyrës së ministrit në detyrë të Drejtësisë, Blerim Sallahu, i është drejtuar me një shkresë ushtruesit të detyrës së Kryeprokurorit të Shtetit, Besim Kelmendi, përmes së cilës i ka kërkuar që të ndërmerren masa ndaj kryeprokurorit të Prokurorisë Themelore në Mitrovicë.
“Të përjashtoni zyrtarin në fjalë, Kryeprokurorin Rexha, nga trajtimi i mëtutjeshëm i rastit, për shkak të ekzistimit të konfliktit të interesit, në përputhje me Nenin 19 paragrafin 2 të Ligjit nr. 06/l -011 për Parandalimin e Konfliktit të Interesit në Ushtrimin e Funksionit Publik. Gjithashtu, vlerësoj që përjashtimi i Prokurorit të rastit, ka bazë edhe në Nenin 43 të Kodit të Procedurës Penale NR. 08/L-032, meqë ekzistimi i konfliktit të interesit është një nga bazat e cekura në Kod për këtë përjashtim”, thuhet në pikën e parë të shkresës së Sallahut ndërsa vazhdon me kërkesën ushtruesi i detyrës së ministrit në detyrë të Drejtësisë që rasti të merret nën juridiksionin e shtruesit të detyrës së Kryeprokurorit të Shtetit.
“ Të nxirrni vendim me shkrim për të marrë nën juridiksionin tuaj këtë rast, me qellim të zhvillimit efikas të procedurës si dhe për arsye të shmangies së konfliktit të interesit nga Zyrtari i lartpërmendur. (në përputhje me Nenin 20, paragrafët 2 dhe 3 të Ligjit për Prokurorin e Shtetit)”, thekson Sallahu
Ndërkohë , në letrën e tij, Sallahu ka kërkuar nga Kelmendi që t’i kërkojë Këshillit Prokurorial që t’i nisë hetimet disiplinore ndaj kryeprokurorit Rexha ndërsa përfundon:
“Të shqyrtoni ankesën për shkeljen disiplinore të përmendur në këtë shkresë nga Kryeprokurori Rexha dhe të kërkoni nga Këshilli Prokurorial i Kosovës fillimin e hetimeve disiplinore në përputhje me Nenin 12 paragrafin 2 të Ligjit nr. 06/L–057 për Përgjegjësinë Disiplinore të Gjyqtarëve dhe Prokurorëve, si dhe të ndërmerren hetimet e nevojshme për konstatimin lidhur me përgjegjësinë penale të zyrtarit në fjalë nga Neni 417 i Kodit Penal të Kosovës nr. 06/L-074.”
