Ministri Sveçla: 8 policë të lënduar, protestuesit serbë përdorën armë

Me përfundimin e aksionit kundër kontrabandës së mallrave të Policisë dhe Doganës në veri të Kosovës, Ministri i Punëve të Brendshme, Xhelal Sveçla, së bashku me Drejtorin e Policisë së Kosovës, Samedin Mehmeti, duke dhënë detaje tha se tetë zyrtarë policorë janë lënduar si pasojë e tensionimit të situatës në veri të Mitrovicës, ku protestuesit serbë kanë përdorur armë të gjata në drejtim të policisë.

“Nisur nga kjo situatë, dëshiroj të theksoj se jemi të përkushtuar për rend dhe ligj. Vërtete Kosova rrezikohet nga krimi ekonomik, terrorizmi dhe nga grupet kriminale, por që jemi të interesuar t’i luftojmë ato. Aksioni i sotëm rezultoi suksesshëm dhe me arrestimin e disa personave, ku ky aksion është në tëre Kosovën dhe assesi ndaj qytetarëve në veri të vendit. Institucionet tona nuk do të toleroj që tundin rendin Kushtetues, dhe të gjithë ata që bien ndesh me ligjin do të arrestohen,” tha Ministri Sveçla duke vlerësuar se aksioni i Policisë së Kosovës kundër kontrabandës i cili sot u zhvilluar në disa komunë përfshirë edhe në pjesën veriore rezultoi i suksesshëm në konfiskimin e mallrave dhe arrestimin e personave.

“Të gjithë personat që janë pjesë e bandave kriminale do përballen me ligjin. Janë 8 zyrtarë të policisë të lënduar dhe i ftojë organet që personat që i sulmuan ata të dalin para ligjit edhe ju gazetarët ishit dëshmitar dhe viktimave të personave dhe strukturave që janë tani të patolerueshme,” tha Sveçla ndërkohë lidhur me vendosjen e barrikadave si shenjë kundërshtimi në veri, ai shtoi se në vazhdimësi bëjmë vlerësimin e situatës.

“Policia e Kosovës së bashku me institucionet tjera ka pasur informacionet fillestare për një barrikadë në Zubin Potok por nuk është më, ka pasur edhe tendenca për barrikada në drejtim të Leposaviçit, ende nuk kemi informacione. Në momentin e duhur marrim hapat e caktuar. Ky operacion nuk është i drejtuar kundër asnjë nacionaliteti, ky operacion është i drejtuar kundër kriminelëve qe kanë kontrabanduar mallra ilegale në Kosovë,” tha Ministri i Punëve të Brendshme duke dhënë detaje për të cilat Presidenti i Serbisë, Aleksandar Vuçiç hesht:

“Prokurori i rastit është serb gjykatësi i procedurës paraprake është serb, pjesëtarët e reagimit të shpejt shumica janë serbë, shumica e të arrestuarve janë shqiptarë por edhe të kërkuarve janë shqiptarë, nuk bëhet për ndonjë represion shtetëror ndaj akujt, askush nuk mund të jetë ombrellë e veprimeve kriminale. Këto veprime janë mëse ligjore dhe mëse të nevojshme dhe do vazhdojmë me aksione të tjera ne jemi koordinuar me bashkëpunëtorët tanë ndërkombëtar.”

Drejtori i Policisë së Kosovës, Samedin Mehmeti, tha se operacioni që është zhvilluar në veri të vendit, ka filluar rreth një vit më parë ndërsa e pranoj se ka pasur rrjedhje të informacionit, e cila është duke u hetuar nga organet e rendit

“Në orët e hershme të mëngjesit të sotëm, ka filluar zbatimi i planit operacional kundër luftimit të grupeve kriminale, në gjashtë lokacione, në Prishtinë, Në Mitrovicë të jugut dhe të veriut dhe në Pejë, ku janë konfiskuar mallra dhe arrestim të disa personave. Janë bastisura shtëpi, magazina dhe lokale të ndryshme. Grupet kriminale janë grumbulluar dhe kanë hedhur shok bomba, kanë shtënë me armë zjarri dhe kanë gjuajtur me bombola të gazit,” tha duke përfunduar:

“Pas gjitha këtyre masave, policia është detyruar t’i ndërmarrë të gjitha masat e nevojshme. Ka pasur rrjedhje të informacionit, e cila është duke u hetuar nga organet e rendit.”